फडणवीसांना कात्रजचा घाट दाखवला, १० मिनिटे शिल्लक असताना अजितदादांनी एबी फॉर्म दिला!

मुंबई : उपमुख्यमंत्री देवेंद्र फडणवीस यांचा प्रचंड विरोध असतानाही राष्ट्रवादीचे अध्यक्ष अजित पवार यांनी ज्येष्ठ नेते नवाब मलिक यांना उमेदवारी दिली आहे. आपण उमेदवारी अर्ज भरणार आहोत असे मंगळवारी सकाळपासून नवाब मलिक सांगत होते. पक्षाच्या वतीने त्यांना एबी फॉर्मही देण्यात आला होता. परंतु पक्षाच्या आदेशानंतरच आपण उमेदवारी अर्ज भरा, अशा सूचना मलिक यांना देण्यात आल्या होत्या. उमेदवारी अर्ज भरण्यासाठी काही मिनिटे शिल्लक असताना मलिक यांनी आपल्या अर्जाला पक्षाचा एबी फॉर्म जोडला. त्यामुळे नवाब मलिक आता महायुतीचे अधिकृत उमेदवार असणार आहेत. देवेंद्र फडणवीस यांना अखेरच्या क्षणांपर्यंत गाफील ठेवून अजित पवार यांनी त्यांना कात्रजचा घाट दाखवला, असे राजकीय वर्तुळात बोलले जात आहे.