एकीकडे भुजबळ ओबीसींसाठी मैदानात, दुसरीकडे अजितदादांचा मराठ्यांसाठी पुढाकार, राष्ट्रवादीचं सोशल इंजिनिअरिंग!

अक्षय आढाव, मुंबई : राज्यातील महापालिका आणि स्थानिक स्वराज्य संस्थांच्या निवडणुका तोंडावर आल्याने कोणताही समाज घटक पक्षापासून दुरावू नये, यासाठी अजित पवार यांच्या नेतृत्वाखालील राष्ट्रवादी काँग्रेस पक्ष विशेष प्रयत्न करीत आहे. मराठा आरक्षण आणि कुणबी दाखल्यांसाठी सरकारने जारी केलेल्या शासन निर्णयाविरोधात ओबीसी नेते छगन भुजबळ यांनी रान उठवून ओबीसी मतांचे एकत्रीकरण होईल, याची काळजी घेतली आहे. ओबीसींची काळजी घेताना दुसऱ्या बाजूला मराठा समाजही आपल्यापासून दुरावणार नाही, याची काळजी खुद्द पक्षाचे अध्यक्ष अजित पवार घेताहेत. राष्ट्रवादीच्या स्थापनेपासून पक्षाचे वैशिष्ट्ये राहिलेले बेरजेचे राजकारण करून सोशल इंजिनिअरिंगद्वारे आगामी निवडणुकांत मतांची बेगमी जुळविण्याची पक्षाची रणनीती आहे.