PSI Accident : पोरीचा शाळेत पहिला नंबर आला, बापानं पेढे वाटले पण घरी येताना सेकंदात होत्याचं नव्हतं झालं! Video

Amravati Crime News : गेल्या काही दिवसात रस्ते अपघाताचं प्रमाण मोठ्या प्रमाणात वाढलं आहे. अशातच अमरावतीमधून धक्कादायक व्हिडीओ समोर आला आहे. धामणगाव रेल्वे तालुक्यातील देवगाव चौफुलीवर एका भरधाव रुग्णवाहिकेने कारला दिलेल्या भीषण धडकेत 8 वर्षीय चिमुरडीचा मृत्यू झाल्याचा धक्कादायक प्रकार समोर आला आहे. तळेगाव दशासर पोलीस ठाण्याचे पोलीस उपनिरीक्षक राहुल वानखडे यांची मुलगी त्रिशा हिचा या अपघातात दुर्दैवी मृत्यू झाला. ही संपूर्ण घटना परिसरातील सीसीटीव्ही कॅमेऱ्यात कैद झाली असून, अपघाताचे दृश्य अत्यंत थरारक आहे. व्हिडीओ पाहून तुमच्याही अंगावर काटा येईल.