कारसारखे दरवाजे, पॉवर विंडो काचा अन् TV, Car लाजवले अशी रिक्षा, विदर्भाच्या राणीचा VIDEO

अमरावती : एखाद्या लक्झरी कारपेक्षाही अधिक आरामदायी, आकर्षक आणि व्हीआयपी प्रवासाचा अनुभव देणारी ही ऑटोरिक्षा म्हणजेच विदर्भाची राणी. या रिक्षेत बसलात की डीजेचा आवाज, एसीचा गारवा, मनोरंजनाचा डोस आणि रंगीबेरंगी दिव्यांचा झगमगाट असं सगळं एकाच वेळी अनुभवायला मिळतं. अमरावतीतील बडनेरा परिसरात राहत असणारे कृष्णा मधुकर रोडगे हे या अनोख्या ऑटोरिक्षाचे मालक आणि चालक आहेत. दिवसा गॅस सिलिंडर वितरणाचं काम आणि रात्री ऑटो रिक्षा चालवणारे कृष्णा रोडगे आज संपूर्ण विदर्भात चर्चेत आहेत. कृष्णाच्या कल्पकतेने आणि मेहनतीने विदर्भाची राणी तयार झाली आहे.