Amravati News : आशा सेविका, गटप्रवर्तकांना दिलासा! जिल्ह्यातील 2198 आशा सेविकांना मिळणार सुरक्षा कवच

अमरावती : आशा स्वयंसेविका आणि गटप्रवर्तक हे गावपातळीवर माता व बालकांमध्ये आरोग्याविषयी जनजागृती करण्याचे काम करतात. महिलांना प्रसुतीपूर्व तपासणी आणि आणखी आरोग्याविषयी काही माहिती पुरवतात. त्यांना हे कर्तव्य बजावत असताना अपघात झाल्यास राज्य सरकारकडून मदत दिली जाणार आहे. आशा सेविकांसाठी विमा योजना सुरू करण्याचा निर्णय राज्य सरकारकडून घेण्यात आला आहे.

आपली जबाबदारी पार पाडत असताना आशा सेविका व गटप्रवर्तक यांचा जर अपघाती मृत्यू झाला तर त्यांना किती रुपयांची मदत विम्याच्या आधारे दिली जाणार आहे? तसेच जर कायमस्वरुपी अंपगत्व आले तर किती मदत दिली जाणार आहे? याबाबत अधिक माहिती जाणून घेऊया.

मिळालेल्या माहितीनुसार, आरोग्य विभागाच्या माध्यमातून अमरावती जिल्ह्यामध्ये 2 हजार 198 आशा स्वयंसेवक आहेत. ग्रामीण भागातील नागरिक व आरोग्य विभाग यांच्यातील दुवा म्हणून ते काम करतात. आरोग्य विभागाकडून मिळालेली महत्वाची माहिती ग्रामीण भागातील नागरिकांना देतात.

आशा सेविकांना हे काम करत असताना अनेक वेळा त्रास सुद्धा सहन करावा लागतो. तरीही त्यांना मिळणारे मानधन जेमतेम आहे. त्यामुळे शासनाने या सेविकांना मानधन वाढवून देण्यासोबत शासकीय सेवेत कायम स्वरुपी रुजू करावे अशी मागणी प्रफुल्ल देशमुख (सचिव, आशा व गटप्रवर्तक संघटना) यांनी केली आहे.