Manikrao Kokate: माणिकराव कोकाटे यांना कोर्टाचा दणका, कोणत्याही क्षणी अटक होण्याची शक्यता

सदनिका घोटाळा प्रकरणात सुनावण्यात आलेली दोन वर्षांच्या कारावासाची शिक्षा नाशिक जिल्हा न्यायालयाने कायम ठेवली आहे. नाशिक जिल्हा न्यायालयाने 16 नोव्हेंबर रोजी याबाबतचा निकाल दिला होता. त्यानंतर आता कोकाटे यांना आमदारकी गमवावी लागण्याची शक्यता आहे.

अॅड. मनोज पिंगळे यांनी माणिकराव कोकाटे यांच्यावतीने युक्तिवाद केला. अटक वॉरंट टाळण्यासाठी युक्तिवाद करण्यात आला होता. माणिकराव कोकाटे हे रुग्णालयात उपचारासाठी दाखल झाले आहेत. माणुसकीच्या दृष्टीने त्यांना सरेंडर करण्यासाठी ४ दिवसांचा वेळ द्यावा अशी मागणी वकिलांनी केली होती. माणिकराव कोकाटे हे शासकीय रुग्णालयात उपचार घेत असल्याची माहिती त्यांनी कोर्टाला दिली. मात्र, कोर्टाने ही विनंती फेटाळून लावताना कोकाटे यांना तात्काळ अटक करण्याचे आदेश दिले. कोकाटे यांनी कायद्याचे पालन करण्याची आवश्यकता असल्याचे कोर्टाने सांगितले.

दरम्यान,  माणिकराव कोकाटे आणि त्यांचे बंधू हे दोन्ही जण नॉट रिचेबल आहेत. माणिकराव कोकाटे यांच्यावतीने मुंबई उच्च न्यायालयात धाव घेण्यात आल्याची माहिती आहे.  मात्र, हायकोर्टाकडून आदेश येण्यापूर्वीच आता कोकाटे आणि त्यांचे बंधू या दोघांविरोधात अटकेची टांगती तलवार आहे.  या दोघांना कोणत्याही क्षणी अटक होण्याची शक्यता आहे.

नेमकं प्रकरण काय?

सुमारे ३० वर्षांपूर्वी माणिकराव कोकाटे यांनी नाशिक शहरात अल्प उत्पन्न गटातून सदनिका मिळवली होती. त्यांनी स्वतःसह भाऊ विजय कोकाटे, पोपट सोनवणे आणि प्रशांत गोवर्धने या चार जणांनी कॅनडा कॉर्नर भागात निर्माण व्ह्यू अपार्टमेंटमध्ये मुख्यमंत्री कोट्यातून अल्प उत्पन्न गटासाठीच्या सदनिका प्राप्त केल्या. तत्कालीन दिवंगत राज्यमंत्री तुकाराम दिघोळे यांनी हे प्रकरण समोर आल्यानंतर सरकारकडून तक्रार देण्यात आली होती, जिल्हा प्रशासनानेही चौकशी केली होती.

या प्रकरणी प्रथम वर्ग न्यायालयाने माणिकराव कोकाटे यांच्यासह त्यांच्या भावाला प्रत्येकी दोन वर्षांचा कारावास आणि १० हजार रुपयांचा दंड अशी शिक्षा सुनावली होती. या निर्णयाविरोधात त्यांनी जिल्हा न्यायालयात धाव घेतली. मंगळवारी (दि. १७) जिल्हा न्यायालयाने माणिकराव कोकाटेंची दोन वर्षांची शिक्षा व दहा हजार रुपयांच्या दंडाची शिक्षा कायम ठेवली आहे. तसेच न्यायालयाने त्यांच्या अटकेचे निर्देशही दिले आहेत. त्यामुळे त्यांच्या अडचणीत भर पडली आहे.