'मुलं येतील का?' म्हणत वृद्धाश्रमात वडिलांचा मृत्यू, मुलांनी शेवटच्या क्षणीही फिरवली पाठ!

दीड वर्षांपूर्वी कृपाळू वृद्धाश्रमाचे संचालक संतोष (अण्णा) सुरडकर यांना टीव्ही सेंटर परिसरातील सुरक्षा रक्षकांचा फोन आला. त्यांच्यासोबत काम करणारे 65 वर्षीय दिनेश यांची मानसिक स्थिती ढासळली होती. त्यानंतर दामिनी पथकाच्या मदतीने त्यांना वृद्धाश्रमात आणण्यात आले. दामिनीने त्यांच्या शहरातील मुलाला फोन करून वडिलांना घेऊन जाण्याचा निरोप दिला, पण त्याने येण्यास नकार दिला. त्यांचा दुसरा मुलगा दुबईला राहतो. दिनेश वृद्धाश्रमात आल्यानंतर त्यांचा स्वभाव अतिशय चांगला होता आणि ते तिथे नव्याने आलेल्या मित्रांसोबत आनंदात राहत होते, असे सुरडकर यांनी सांगितले.

तीन महिन्यांपूर्वी दिनेश यांची तब्येत ढासळली. त्यांना घाटी रुग्णालयात दाखल करण्यात आले, पण तरीही मुले त्यांना भेटायला आली नाहीत. दुबईच्या मुलाने उपचारांसाठी काही पैसे पाठवले, आणि त्यातून ते बरे झाले. पण आठ दिवसांपूर्वी पुन्हा त्यांची तब्येत बिघडली. त्यावेळी त्यांनी, 'आता काही मी जगत नाही, माझ्या मुलांना बोलवा,' असा निरोप दिला. दोन्ही मुलांनी पुन्हा एकदा येण्यास नकार दिला.