बीडपासून मध्य प्रदेशपर्यंत पाठलाग, CCTV व्हायरल अन् विशाल सूर्यवंशीला अखेर बेड्या; बीड हत्याकांडातील मुख्य सूत्रधार जेरबंद!

ही संपूर्ण घटना बीड शहरातील अंकुशनगर भागात ६ जानेवारी रोजी घडली होती. हर्षद शिंदे नावाचा तरुण जो व्यवसायाने प्लंबर होता, तो नळाच्या दुरुस्तीसाठी खड्डा खोदत असताना त्याच्यावर गोळ्या झाडण्यात आल्या होत्या. केवळ खड्डा खोदल्याच्या कारणावरून विशाल सूर्यवंशी याने ही टोकाची पायरी उचलली होती. विशेष म्हणजे, शिंदे आणि सूर्यवंशी हे पूर्वी एकाच परिसरात राहत असल्याने एकमेकांच्या परिचयाचे होते, मात्र या क्षुल्लक वादाचे रूपांतर खुनात झाले.

घटनेनंतर आरोपी सूर्यवंशी आपल्या दुचाकीवरून फरार झाला होता. पोलिसांनी त्याचा शोध घेण्यासाठी विविध पथके रवाना केली होती, अगदी मध्यप्रदेशातही एका पथकाला पाठवण्यात आले होते. दरम्यानच्या काळात, या खुनाचे सीसीटीव्ही फुटेज सोशल मीडियावर व्हायरल झाल्याने लोकांमध्ये भीतीचे वातावरण होते. पोलिसांनी आरोपीच्या कुटुंबाचीही कसून चौकशी केली होती, तरीही ५ दिवस त्याचा पत्ता लागत नव्हता.

अखेर सहाव्या दिवशी म्हणजेच रविवारी, स्थानिक गुन्हे शाखेला यश आले आणि त्यांनी विशाल सूर्यवंशी याला बेड्या ठोकल्या. ही कारवाई स्थानिक पोलिसांसाठी मोठे यश मानली जात आहे. सध्या आरोपीला ताब्यात घेऊन त्याची अधिक चौकशी सुरू आहे. भर दिवसा झालेल्या या हत्येमुळे शहरात सुरक्षेचा प्रश्न ऐरणीवर आला होता, जो आता आरोपीच्या अटकेनंतर काहीसा शांत होण्याची चिन्हे आहेत.