Nagar Parishad Election: प्रचाराच्या रणधुमाळीत भाजपला धक्का, 2 उमेदवारांनी 'मैदान' सोडलं!

हिंगोली : राज्यभरात नगरपंचायत आणि नगरपरिषद निवडणुकीचा धुरळा उडाला आहे. राज्यभरात प्रचार सभा एकीकडे सुरू झाल्या आहेत. तर दुसरीकडे भाजपला ऐन प्रचारादरम्यान धक्का बसला आहे.  हिंगोलीत भाजपच्या नगरसेवकपदाच्या आणखी दोन उमेदवारांचे अर्ज मागे घेतला आहे. त्यामुळे भाजपच्या गोटात खळबळ उडाली आहे.

दरम्यान, हिंगोलीमध्ये महायुतीमध्ये धुसफूस सुरू असल्याचं पाहण्यास मिळालं.  राज्यात भाजप शिवसेनेच्या कार्यकर्ते पदाधिकारी फोडाफोडीचं प्रकरण गाजलं होतं. त्याच दरम्यान, हिंगोलीत शिवसेनेचे आमदार संतोष बांगर यांनी भाजपला धक्का दिला. हिंगोली नगरपरिषद वार्ड क्रमांक 16 ब मधील भाजपचे अधिकृत उमेदवार भास्कर बांगर यांनी आपला उमेदवारी अर्ज मागे घेतला. शिवसेनेचं उमेदवार श्याम कदम यांना पाठिंबा दिला आहे, एवढंच नव्हे तर त्यांनी आमदार संतोष बांगर यांच्या हस्ते शिवसेनेत प्रवेश केला. त्यामुळे हिंगोली भाजपला हा चांगलाच धक्का मानला जात आहे.

तर,  हिंगोलीत भाजपच्या एका महिला पदाधिकाऱ्याने भाजपला सोडचिठ्ठी देत आमदार संतोष बांगर यांच्या उपस्थितीत शिवसेनेत प्रवेश केला होता. भारतीय जनता पक्षाने आपल्याला उमेदवारी देण्याचं आश्वासन दिलं होतं, पण, ऐनवेळी मात्र दुसऱ्याला उमेदवारी दिल्याचा आरोप ज्योती वाघमारे यांनी केला होता. नाराज झालेल्या या महिला पदाधिकाऱ्याने भाजप सोडून शिवसेनेत प्रवेश केला होता.