BMC Election: ठाकरे बंधूंनी विरोध केलेल्या 'पाडू'चा दोन वॉर्डमध्ये वापर, अखेर कोण ठरलं विजयी?

प्रकाश मोरे यांचा विजय एल वॉर्डमधील कुर्ला प्रभाग १५९ मध्ये भाजपचे प्रकाश मोरे आणि काँग्रेसचे प्रल्हाद शेट्टी यांच्यात अटीतटीची लढत होती. दुसऱ्या फेरीत एका ईव्हीएममध्ये तांत्रिक बिघाड झाल्याने मोजणी थांबवण्यात आली होती. इतर मशिनची मोजणी पूर्ण झाल्यावर दोन्ही उमेदवारांमध्ये ४८३ मतांचा फरक होता, तर बिघडलेल्या मशिनमध्ये ५३१ मते होती. या ५३१ मतांवरच जय-पराजयाचा फैसला अवलंबून होता. अखेर निवडणूक आयोगाच्या परवानगीने 'पाडू' यंत्राचा वापर करण्यात आला आणि त्यात भाजपचे प्रकाश मोरे सरस ठरल्याने त्यांना विजयी घोषित करण्यात आले.

सुरेश आवळे यांची बाजी असाच प्रकार घाटकोपर येथील एन वॉर्डमधील प्रभाग क्रमांक १२५ मध्ये घडला. येथेही ईव्हीएम सुरू होत नसल्याने मतमोजणीत अडथळा निर्माण झाला होता. येथेही प्रशासनाने 'पाडू' यंत्राच्या सहाय्याने आकडेवारी स्पष्ट केली आणि शिवसेनेचे (शिंदे गट) सुरेश आवळे यांनी विजय संपादन केला.