फेब्रुवारीत लग्न, साखरपुड्याच्या आदल्या दिवशी कळालं नवरी गरोदर, अलिबागमध्ये 15 वर्षीय मुलीसोबत नको तेच घडलं

समीर नारायण नाईक असं अटक केलेल्या २० वर्षीय तरुणाचं नाव आहे. तो मागील काही महिन्यांपासून १५ वर्षांच्या अल्पवयीन मुलीला फूस लावून तिच्यावर वारंवार लैंगिक अत्याचार करत होता. याच अत्याचारातून पीडित मुलगी गर्भवती राहिली. धक्कादायक बाब म्हणजे ती अल्पवयीन असूनही घरच्यांनी तिचा विवाह ठरवला होता. ही बाब आरोपीला देखील माहीत होती. तरीही तो तिच्यावर वारंवार अत्याचार करत होता. पण साखरपुड्याच्या आदल्या दिवशी पीडित मुलगी सहा महिन्यांची गर्भवती असल्याचे समोर आल्यानंतर या प्रकरणाचा उलगडा झाला.

मिळालेल्या माहितीनुसार, नोव्हेंबर २०२४ मध्ये पीडित मुलगी आणि आरोपी समीर नाईक यांची ओळख झाली होती. या ओळखीचे रूपांतर पुढे प्रेमसंबंधात झाले. मात्र, आरोपीने या संबंधांचा गैरफायदा घेत जानेवारी २०२५ पासून मुलीवर वारंवार अत्याचार करण्यास सुरुवात केली. मुलीच्या घरात आणि पोयनाड येथील आदिवासी पाडा परिसरात त्याने तिच्याशी वारंवार शारीरिक संबंध प्रस्थापित केले.

विशेष म्हणजे पीडित मुलगी अल्पवयीन असल्याचं माहीत असूनही कुटुंबीयांनी गेल्यावर्षी तिचा विवाह ठरवला होता. त्यानुसार, ८ जानेवारी रोजी तिचा साखरपुडा होणार होता. तर २४ फेब्रुवारीला लग्नाचा मुहूर्त काढला होता. दोन्ही कुटुंबीयांकडून लग्नाची तयारी सुरू होती. दरम्यान, साखरपुड्याच्या आदल्या दिवशी म्हणजे ०७ जानेवारी २०२६ रोजी पीडित मुलीला अचानक तीव्र पोटदुखीचा त्रास होऊ लागला. त्यामुळे तिला तातडीने रेवदंडा येथील प्राथमिक आरोग्य केंद्रात उपचारासाठी दाखल करण्यात आले. डॉक्टरांनी तिची वैद्यकीय तपासणी केली असता, ती सहा महिन्यांची गर्भवती असल्याचे स्पष्ट झाले. डॉक्टरांनी दिलेल्या या माहितीमुळे कुटुंबीयांच्या पायाखालची जमीन सरकली आणि या संपूर्ण गंभीर प्रकाराचा पर्दाफाश झाला.

या घटनेनंतर रेवदंडा पोलीस ठाण्यात धाव घेऊन तक्रार दाखल करण्यात आली. पोलिसांनी प्रकरणाचे गांभीर्य ओळखून १३ जानेवारी २०२६ रोजी आरोपी समीर नारायण नाईक याला अटक केली आहे. आरोपीवर बाल लैंगिक अत्याचार प्रतिबंधक कायदा (POCSO Act 2012) आणि भारतीय न्याय संहिता (BNS Act 2023) मधील विविध कलमांनुसार गुन्हा दाखल करण्यात आला आहे. पोलीस उपनिरीक्षक दगू बाजीराव गांगुर्डे या प्रकरणाचा अधिक तपास करत आहेत.