Dahihandi : दहीहंडी उत्सवाला गालबोट; गॅलरी कोसळली, 1 मुलगी जागीच ठार, 1 गंभीर

देऊळगाव राजा येथे दहीहंडीसाठी बांधलेल्या दोरीसह गॅलरी कोसळून झालेल्या अपघातात एक चिमुकली जागीच ठार तर दुसरी गंभीर जखमी झाल्याची घटना आज (ता. 7) रात्री आठच्या सुमारास शहरातील मानसिंग पुरा येथे घडली.

जन्माष्टमीनिमित्त दहीहंडीसाठी बंद अवस्थेत असलेल्या एका घराच्या गॅलरीवर दोर बांधण्यात आली होती. सदर दहीहंडी फोडण्यासाठी गोविंदा वर चढले होते. दहीहंडी बांधलेल्या दोरला युवक लटकले, त्यावेळी सिमेंटच्या पिलरसह लोखंडी गॅलरी खाली कोसळून दुर्घटना घडली. या दुर्घटनेत खाली उभे राहून दहीहंडी पाहणाऱ्या निदा रशीद खान पठाण (वय 9 वर्ष) ही चिमुकली जागीच ठार झाली. तर अल्फिया शेख हाफिज (वय 8) तिच्या डोक्याला आणि पायाला गंभीर इजा झाली. प्रथमोपचार नंतर अल्फिया हिला जालना येथे हलविण्यात आले तर मृतक निदा पठाण हिस ग्रामीण रुग्णालयात पोस्टमार्टमसाठी हलविण्यात आले होते. जन्माष्टमीनिमित्त दहीहंडीच्या कार्यक्रमात घडलेल्या या दुर्घटनेने हळहळ व्यक्त होत आहे.

दहीहंडी उत्सवात दरवर्षीप्रमाणे यंदाही राजकीय पक्षांचे नेते मोठ्या दिमाखात सहभागी झाले आहेत. जन्माष्टमीच्या निमित्ताने मुंबई, ठाण्यात अनेक दशकांपासून साजऱ्या होणाऱ्या या लोकप्रिय उत्सवासाठी लाखोंची बक्षिसे ठेवण्यात आली आहेत. मानवी थराच्या उंचीच्या आधारावर हे बक्षीस निश्चित करण्यात आले आहे.