'भाऊ सोयाबीनला भाव मिळून द्या' चिमुकल्याचं तुपकरांना भावनिक पत्र, खाऊचे पैसेही दिले मोर्चाला

बुलढाणा, 13 नोव्हेंबर, राहुल खंडारे : 'मला यंदा दिवाळीला नवीन कपडे व खाऊ नको, आपल्या सोयाबीनला भाव हवा आहे. त्यामुळे सोयाबीनच्या भावासाठी लढणारे रविकांतभाऊ तुपकर यांच्या एल्गार मोर्चासाठी मी हे पैसे देणार आहे. रविकांतभाऊ तुम्ही सरकारच्या धोरणा विरोधात लढा आणि आमच्या सोयाबीनला भाव मिळवून द्या', असे भावनिक पत्र इयत्ता चौथीमध्ये शिकणाऱ्या आयुष गोपाल सुरडकर या चिमुकल्याने शेतकरी नेते रविकांत तुपकर यांना लिहिले आहे. नुसतेच पत्र लिहून तो थांबला नाही तर त्याने दोन हजार रुपये त्याच्या वडिलांना रविकांत तुपकर यांना पाठविण्यास भाग पाडले आहे.