महाराष्ट्रात 'लाडक्या बहिणी'चा गवगवा मात्र झारखंडमध्ये 'लाडक्या बहिणीला' मोदींचा विरोध, वडेट्टीवारांचा हल्ला

झारखंडमध्ये जाऊन लाडकी बहीण योजनेवर पंतप्रधान नरेंद्र मोदी यांनी टीका केली. त्याचवेळी महाराष्ट्रातल्या लाडकी बहीण योजनेचा मात्र मोठ्या प्रमाणावर गाजावाजा सुरू आहे. भाजपचे हे दुतोंडी धोरण नाही काय? असा सवाल वडेट्टीवार यांनी विचारला.

राज्याच्या ७६ टक्के भागात दुष्काळ आहे, अतिवृष्टीने प्रचंड नुकसान झाले आहे. शेतकऱ्यांना मदत दिली पाहिजे पण भाजपा सरकारने तेलंगणाला ४ हजार कोटी रुपयांचे पॅकेज दिले परंतु महाराष्ट्राला मात्र फुटकी कवडीही दिली नाही. केंद्र व राज्यातील भाजपा सरकार जाणीवपूर्वक शेतकऱ्यांवर अन्याय करत आहे. भाजपा युती सरकार सर्व आघाड्यांवर फेल आहे पण भ्रष्टाचारात मात्र अग्रेसर आहे, अशी टीका काँग्रेस प्रदेशाध्यक्ष नाना पटोले यांनी केली.

भाजपने सत्तेवर जाण्यासाठी शिवसेना आणि राष्ट्रवादी काँग्रेस पक्षाची तोडफोड केली. राज्यात शांतता सुव्यवस्थेचा बोजवारा उडाला आहे, महिला अत्याचार वाढले आहेत, अंमली पदार्थांचा काळा धंदा वाढला आहे. सत्ताधारी पक्षाचा आमदार पोलीस स्टेशनमध्ये जाऊन गोळीबार करतो. जमीन व्यवहारातून सरकारने मोठा भ्रष्टाचार केला आहे. सरकारी पैशाची उधळपट्टी सुरु आहे. असे हे भ्रष्ट सरकार घालवण्याची जनतेची इच्छा आहे. लोकसभेपेक्षा विधानसभेला चांगला प्रतिसाद मिळेल आणि महाविकास आघाडी सरकार पुन्हा सत्तेवर नक्की येईल, असा विश्वास बाळासाहेब थोरात यांनी व्यक्त केला.