Chhatrapati Sambhajiangar: भावासोबत असं कोण वागतं? आईवडिलांचं निधन, प्रॉपर्टीसाठी बहिणींचं भयंकर कांड

या प्रकरणात सुनीता दिलीप लाहोटी (रा. कोलकाता, पश्चिम बंगाल) आणि शोभना शरद टुवानी (रा. जयपूर, राजस्थान) यांच्याविरोधात गुन्हा नोंदवण्यात आला आहे. फिर्यादी उद्योजक सुनीलकुमार हरिकिशन कलाणी (वय 64, रा. बीड बायपास) यांनी पोलिसांत दिलेल्या तक्रारीत ही माहिती दिली आहे.

फिर्यादीनुसार, त्यांचे वडील हरिकिशन कलाणी हे मूळ सिलीगुडी (पश्चिम बंगाल) येथील व्यापारी होते. 2020 मध्ये कर्करोगामुळे त्यांचे निधन झाले. त्यांनी केलेल्या मृत्युपत्रानुसार सिलीगुडीतील मालमत्ता व बँक ठेवींचा वारस म्हणून सुनीलकुमार यांचे नाव नमूद होते. मात्र, याच कारणावरून दोन्ही बहिणींनी आजारी असलेल्या आईला जयपूर येथे नेले. त्यानंतर विविध बँक खाती आणि डी-मॅट खात्यांवरील नॉमिनी म्हणून असलेले सुनीलकुमार यांचे नाव बदलून स्वतःची नावे नोंदवून घेतल्याचा आरोप आहे.

आईचे 20 मार्च 2024 रोजी निधन झाल्यानंतर हा प्रकार उघड झाला. एचडीएफसीच्या डी-मॅट खात्यातील सुमारे 80 लाख रुपयांचे शेअर्स बहिणींनी स्वतःच्या खात्यावर वर्ग केल्याचे तक्रारीत नमूद आहे. तसेच अॅक्सिस बँक आणि पंजाब नॅशनल बँकेतील प्रत्येकी 15 लाख रुपये, तर कोटक महिंद्रा बँकेतील 50 लाख रुपये नॉमिनी बदलाच्या माध्यमातून काढून घेतल्याचा आरोप करण्यात आला आहे.

याशिवाय जयपूरमधील सुशांत सिटी परिसरातील प्लॉटसंदर्भातही गैरव्यवहार झाल्याचे सांगितले आहे. आईकडून कोऱ्या अर्जांवर स्वाक्षऱ्या घेऊन संबंधित प्लॉट सुमारे 35 लाख रुपयांना विकण्यात आला आणि ती रक्कमही स्वतःकडे घेतल्याचे फिर्यादीचे म्हणणे आहे. एकूण व्यवहाराची रक्कम सुमारे 1 कोटी 95 लाख रुपयांहून अधिक असल्याचा दावा करण्यात आला असून, या संपूर्ण प्रकरणाचा तपास सातारा पोलिस करत आहेत.