ऐन पावसाळ्यात पाणीबाणी, छ. संभाजीनगरमध्ये आधीच 7 दिवसआड पुरवठा, त्यात विजेचा खोळंबा!

‎शुक्रवारी सिडको परिसरात वीज बंद केल्यामुळे तेथील पाणीपुरवठ्याचा क्रम एक दिवसाने पुढे गेला. जायकवाडी धरण भरलेले असले तरी दसऱ्याच्या तोंडावर नागरिकांना पाण्यासाठी प्रतीक्षा करावी लागत आहे, हे दुर्दैवी वास्तव आहे. ‎सिडको, हडको, चिकलठाणा, चौधरी कॉलनी, गारखेडा, उल्कानगरी, रोशन गेट, कटकट गेट, किराडपुरा, दिल्ली गेट आणि अन्य परिसरांत पाणीपुरवठा टप्पा नियोजित वेळेपेक्षा उशिराने झाला. जुने शहर आणि उस्मानपुरा भागातसुद्धा पाण्याचे वेळापत्रक विस्कळीत झाले आहे.

‎दरम्यान, 2500 मिमी व्यासाची नवीन जलवाहिनी जोडण्यासाठी 12 सप्टेंबरपासून 5 दिवसांचा शटडाऊन जाहीर केला होता. परंतु, सततच्या पावसामुळे काम पूर्ण होऊ शकले नाही. आता नवरात्रौत्सवानंतर पुन्हा 5 दिवसांचा शटडाऊन घेण्यात येणार आहे, त्यामुळे पुढील काही दिवस पाणीपुरवठा आणखी अडचणीत येण्याची शक्यता आहे.

‎“पावसामुळे काही ठिकाणी वीजपुरवठा खंडित झाल्याने पाणी उशिराने पोहोचले. चिकलठाणा, चौधरी कॉलनी, विठ्ठलनगर अशा भागांमध्ये पाणीपुरवठा एक दिवस उशिराने झाला. मात्र उद्यापर्यंत सर्व भागात पाणी वेळेवर पोहोचेल. सण-उत्सवाच्या काळात नागरिकांना त्रास होऊ नये, यासाठी प्रयत्न सुरू आहेत,” असे मनपाचे कार्यकारी अभियंता किरण धांडे यांनी सांगितले.