माझ्या नवऱ्याला 'इन्स्टा'वर फॉलो का केलं?; शेजारणींच्या दोन गटांत रस्त्यावर तुंबळ हाणामारी

सिडको पोलिस ठाण्यात दाखल तक्रारीनुसार, शेजारच्या महिलेने आपल्या पतीला इन्स्टाग्रामवर फॉलो केल्याच्या संशयावरून ही लढाई पेटली. ‎ ‎आंबेडकरनगरच्या गल्ली क्रमांक 9 मध्ये 8 ऑक्टोबर 2025 च्या रात्री एका इन्स्टाग्राम फॉलोच्या वादाने चक्क रस्त्यावर हाणामारीचा तमाशा रंगला! शेजारी राहणाऱ्या दोन महिलांमधला हा वाद इतका भडकला की, गल्लीत अर्धा तास धडाम-धडाम सुरू होतं. सिडको पोलिस ठाण्यात दाखल तक्रारीनुसार, हा सगळा प्रकार एका साध्या संशयावरून उफाळला – "तू माझ्या नवऱ्याला इन्स्टाग्रामवर का फॉलो केलंस?"

‎‎31 वर्षीय फिर्यादी महिला घरासमोर उभी असताना शेजारची महिला तिच्यावर तुटून पडली. "माझ्या नवऱ्याला तू फॉलो का केलंस?" असा थेट सवाल तिने केला. फिर्यादीने शांतपणे समजावण्याचा प्रयत्न केला, "अगं, मी काही फॉलो केलं नाही, उलट तुझ्या नवऱ्यानेच मला फॉलो केलंय!" पण समोरची बाई ऐकण्याच्या मूडमध्येच नव्हती. मग काय, शाब्दिक बाचाबाचीला सुरुवात झाली आणि काही वेळातच ती थेट मारामारीत बदलली. मुख्य आरोपी महिलेसोबत तिची नणंद आणि आणखी एक मैत्रीणही होती. या तिघींनी फिर्यादीला शिव्या दिल्या आणि नणंदेने तर चक्क दगड उचलून फिर्यादीच्या डोक्यावर हाणला. यात फिर्यादी गंभीर जखमी झाली.

‎‎या राड्यामुळे गल्लीत एकच गर्दी जमली. फिर्यादीचा भाऊ तिथे पोहोचला आणि त्याने तिला तातडीने रुग्णालयात दाखल केलं. सिडको पोलिसांनी तक्रार दाखल करून मुख्य आरोपीसह त्या दोन महिलांवर गुन्हा नोंदवला आहे. हवालदार विद्या राठोड आता या प्रकरणाचा तपास करत आहेत.