पाळी लांबविण्याच्या गोळ्या घेत असाल तर आताच थांबा, अन्यथा होतील हे गंभीर परिणाम

छत्रपती संभाजीनगर : मासिक पाळी येणे ही एक नैसर्गिक प्रक्रिया आहे. महिन्यातून एक वेळा ही प्रत्येक महिलेला येत असते. मात्र, महिला या कोणत्याही कारणामुळे किंवा धार्मिक कामासाठी पाळी लांबविण्याच्या गोळ्या घेतात. मात्र, याचे अनेक वाईट परिणाम हे आपल्या शरीरावर होतात. त्यामुळे यामुळे शरीरावर नेमके काय दुष्परिणाम होतात, याबाबत स्त्रीरोग तज्ञ डॉ. रश्मी बोरीकर यांनी महत्त्वाची माहिती दिली.

लोकल18 शी बोलताना त्यांनी सांगितले की, पाळी येणे एक नैसर्गिक चक्र आहे. त्यामध्ये आपण ढवळाढवळ करणे हे अत्यंत चुकीचे आहे. या गोळ्या घेतल्याने जी नैसर्गिक पद्धतीने पाळी येते, ती पाळी येण्याचे चक्र बिघडून जाते. म्हणजेच की, जे नैसर्गिक बीज तयार होत असतात ते या गोळीमुळे तयार होत नाही आणि यामुळे पाळीमध्ये अनियमितता येऊ शकते. त्यामुळे असे करणे चुकीचे आहे. वारंवार या गोळ्या घेतल्याने रिप्रोडक्शन सिस्टीमवर परिणाम होतात. पण त्यासोबतच संपूर्ण शरीरावरही याचे परिणाम होतात.