घरची परिस्थिती हालाखीची, पण तरुणाने करुन दाखवलं, कंपनीमध्ये काम करून बनला पोलीस!

छत्रपती संभाजीनगर : पोलीस व्हावे, असे अनेकांचे स्वप्न असते. त्यासाठी अत्यंत मेहनत आणि कष्टही उमेदवार घेतात आणि शेवटी आपले स्वप्न पूर्ण करतात. आज अशाच एका तरुणाची कहाणी आपण जाणून घेणार आहोत, ज्याने कंपनीमध्ये काम करत पोलीस भरतीचे स्वप्न पाहिले, त्यासाठी तयारी केली, मेहनत घेतली आणि आपले हे स्वप्न पूर्ण केले.

राम उदाट असे या तरुणाचे नाव आहे. राम आता पोलीस झाला आहे. राम उदाट हा मूळचा छत्रपती संभाजी नगर जिल्ह्यातील पैठण तालुक्यामधील रहिवासी आहे. त्याचे आई वडील शेतीकाम करतात. रामने दहावीपर्यंत शिक्षण हे त्याच्या गावातील शाळेत घेतले. त्यानंतर पुढील शिक्षणासाठी आणि काम करण्यासाठी तो छत्रपती संभाजीनगर शहरातील वाळूज या ठिकाणी आला.

रामने अकरावी बारावीचे शिक्षण विज्ञान शाखेमधून पूर्ण केले आहे. पण घरची परिस्थिती हालाखीची असल्याने त्याला शिक्षण घेत कामदेखील करावे लागले. राम एका खाजगी कंपनीमध्ये काम करू लागला. त्यानंतर तो रोज जेव्हा कंपनीत जायचा तेव्हा त्याला पोलीस भरतीची तयारी करणारे उमेदवार दिसत होते.

त्याने भारतीय नौदलाचीही परीक्षा दिली होती. मात्र, अवघ्या काही पॉईंटने त्याचे यश हुकले. मात्र, त्याने परत एकदा पोलीस भरतीची परीक्षा दिली. त्यामध्येही त्याला अपयश आलं. पण तो अशा कठीण परिस्थितीमध्येही खचला नाही आणि परत त्याने नव्याने सुरुवात केली. दुर्दैवाने याच दरम्यान त्याच्या आईचे निधन झाले. आईच्या जाण्याने मात्र, राम पूर्णपणे खचून गेला. पण यामध्ये त्याच्या कुटुंबाने त्याच्या बहिणींनी त्याच्या भावांनी त्याची साथ दिली.