१ हजारपेक्षा जास्त लोकसंख्या असणाऱ्या प्रत्येक गावात.., फडणवीस सरकारचा मोठा निर्णय!

राज्यातील १ हजारांपेक्षा जास्त लोकसंख्या असलेल्या गावांना मजबूत काँक्रीट रस्त्यांनी जोडण्याचा मोठा कार्यक्रम सरकार राबवणार आहे. या योजनेसाठी सुमारे ४ हजार ५०० कोटी रुपयांचा निधी खर्च केला जाणार असून या प्रकल्पासाठी आशियाई विकास बँकेचे आर्थिक सहाय्य घेतले जाणार आहे. ग्रामीण भागातील वाहतूक सुलभ करण्यासोबतच शेतमालाची वाहतूक आणि स्थानिक अर्थव्यवस्थेला चालना देणे हा या योजनेचा मुख्य उद्देश असल्याचे सरकारने स्पष्ट केले आहे.

पुणे आणि लोणावळा दरम्यान वाढत्या रेल्वे वाहतुकीचा विचार करून तिसरी आणि चौथी रेल्वे मार्गिका उभारण्याचा निर्णय घेण्यात आला आहे. या प्रकल्पासाठी सुमारे ५ हजार १०० कोटी रुपयांचा खर्च अपेक्षित आहे. या रेल्वे मार्गिकेमुळे औद्योगिकदृष्ट्या महत्त्वाच्या पिंपरी चिंचवड आणि तळेगाव दाभाडे परिसराला मोठा फायदा होणार आहे. उद्योगधंद्यांच्या वाहतुकीसाठी तसेच प्रवाशांच्या सोयीसाठी हा प्रकल्प महत्त्वाचा ठरणार असल्याचे सांगितले जात आहे.

पुणे महानगरातील वाहतूक कोंडी कमी करण्यासाठी मेट्रो प्रकल्पाच्या दुसऱ्या टप्प्यातील काही महत्त्वाच्या मार्गांना मान्यता देण्यात आली आहे. खडकवासला, स्वारगेट, हडपसर आणि खराडी या भागांना जोडणाऱ्या मेट्रो मार्गिकेच्या हडपसर ते लोणी काळभोर आणि सासवड रोड या भागाला मंजुरी देण्यात आली आहे.

पवनार (वर्धा) ते पत्रादेवी (सिंधुदुर्ग) दरम्यान प्रस्तावित शक्तिपीठ महामार्गाच्या कोल्हापूर आणि सिंधुदुर्ग जिल्ह्यातील सुधारित मार्गाला मंजुरी देण्यात आली आहे. या प्रकल्पासाठी भूसंपादनाची प्रक्रिया अंतिम टप्प्यात पोहोचली असल्याचे सांगण्यात आले.