धक्कादायक! एकाच मेडिकलमधून 19 हजार नशेच्या गोळ्यांची विक्री, मोठ्या रॅकेटची शक्यता; पोलिसांची कारवाई

बालाजी निरफळ, धाराशिव, 18 सप्टेंबर : धाराशिवमध्ये नशेच्या गोळ्यांची विक्री केल्या प्रकरणी एका मेडिकलवर अन्न औषध प्रशासन विभागाने कारवाई केलीय. या कारवाईने धाराशिव जिल्ह्यात मोठी खळबळ उडाली आहे. उमरगा इथं असलेल्या आर्या मेडिकलमधून झोपेची औषधे डॉक्टरांच्या सल्ल्याशिवाय विक्री केली जात असल्याची माहिती अन्न आणि औषध प्रशासनाला मिळाली होती. पोलिसांच्या मदतीने अन्न औषध प्रशासनाने मेडिकलवर धाड टाकली असता एक लाख ४० हजार रुपयांचा अवैध औषधसाठा जप्त केला. तर मेडिकल चालकाने १९ हजारांहून अधिक नशेच्या गोळ्यांची विक्री केली असल्याची माहिती समोर आली आहे. या प्रकरणी उमरगा पोलीस ठाण्यात मेडिकल चालकाविरोधात गुन्हा दाखल करण्यात आला आहे.