'इंजेक्शन द्यायचंय आत या', कराडमध्ये डॉक्टरचं विवाहितेसोबत नको ते कृत्य, जमावाने दिला चोप

ही घटना कराड विमानतळ परिसरातील एका गावात घडली आहे. येथील एका आजारी महिलेसोबत डॉक्टरने दवाखान्यात गैरवर्तन करण्याचा प्रयत्न केला आहे. हा प्रकार उघडकीस आल्यानंतर डॉक्टरला संतप्त ग्रामस्थांनी बेदम चोप दिला असून त्यास पोलिसांच्या हवाली केले आले आहे. डॉ. अल्ताफ हुसेन उस्मानसा नदाफ असे पोलिसांनी ताब्यात घेतलेल्या डॉक्टरचे नाव आहे.

मिळालेल्या माहितीनुसार, शुक्रवारी दुपारी पीडित महिला आपल्या सासूसोबत दवाखान्यात गेली होती. त्यावेळी दवाखान्यातील पडदा ओढत तपासणीच्या बहाण्याने आणि इंजेक्शन करण्याच्या बहाण्याने डॉक्टरने संबंधित विवाहितेशी गैरवर्तन करण्याचा प्रयत्न केला. यावेळी घाबरलेल्या विवाहितेने या प्रकाराची माहिती सासूला दिली नव्हती. मात्र माहेरी गेल्यानंतर विवाहितेने तिच्या आईला या प्रकाराची कल्पना दिली. तसेच परगावी असणार्‍या पतीला घडलेला प्रकार सांगितला.

शनिवारी दुपारी एक वाजण्याच्या सुमारास डॉक्टरांना जाब विचारण्यासाठी संबंधित विवाहितेचे नातेवाईक गेले असता त्या ठिकाणी उपस्थित संतप्त ग्रामस्थांनी डॉक्टरला चोप दिला. यावेळी पलायन करण्याच्या प्रयत्नातील डॉक्टरला रोखून धरत विवाहितेच्या नातेवाईकांनी या घटनेची माहिती शहर पोलिसांना दिली. कराड शहर पोलीस ठाण्यात गुन्हा नोंद करण्यात आला असून पोलीस उपअधीक्षक राजश्री पाटील या तपास करत आहेत.