Jamkhed Milk Adulteration: दूध आहे की विष? गोठ्यातच भेसळीचे रॅकेट उघड; तिघांना अटक

दूध भेसळीचा पर्दाफाश करताना अन्न- औषध प्रशासन आणि स्थानिक गुन्हे शाखेच्या पथकाने तिघांना अटक करत दूध भेसळीचे साहित्यही जप्त केले. अन्न- औषध प्रशासनाने आणि स्थानिक गुन्हे शाखेच्या पथकाने संयुक्तरित्या फकराबाद गावामध्ये कारवाई केलेली आहे. फकराबादमधील शेतकर्‍यांच्या गोठ्यामध्ये भेसळ युक्त दूध विकलं जात असल्याची माहिती मिळाली. माहिती मिळताच टीम फकराबादमध्ये दाखल झाली, लगेचच त्यांनी कारवाई करायलाही सुरूवात केली. या टीमने दूध भेसळ करण्याच्या साहित्यासह तिघांना अटक केली आहे. अहिल्या नगरमधील ग्रामीण भागातल्या दूध भेसळीच्या प्रकारामुळे अन्न औषध प्रशासन आणि स्थानिक गुन्हे शाखा ॲक्टिव्ह मोडवर आली आहे.

केलेल्या कारवाईमध्ये अनेक रसायने आणि इतरत्र दूध भेसळीचं साहित्यही जप्त केल्या आहेत. रामदास उबाळे, समीर शेख आणि आफताब सेफ या आरोपींना पोलिसांनी जेरबंद केले आहे. त्यांच्याकडून कारवाईदरम्यान दूध तयार करण्यासाठी लागणारे साहित्य, पॅराफेन लिक्विड हे रसायनसह इतर रासायनिक पदार्थही जप्त केले आहे. वेगवेगळ्या पद्धतीतून दूध भेसळीचे प्रकार फकराबाद गावामध्ये घडत होते. वेगवेगळ्या पद्धतीतून सुरू असलेल्या भेसळीचा प्रकार पाहून पोलिसांसह अन्न औषध प्रशासनही चक्रावून गेले. या सर्व प्रकरणामध्ये शेतकरी आणि व्यापाराचा सहभाग होता. व्यापारी शेतकऱ्याच्या मदतीने दूधामध्ये भेसळकरून नागरिकांना दूध सप्लाय करत होता.