IAS वसुमना पंत चंद्रपूरच्या पहिल्या महिला कलेक्टर, नागपूरवरून बदली

चंद्रपूरचे मावळते जिल्हाधिकारी विनय गौडा यांच्या नव्या नियुक्तीबाबत मात्र स्पष्टता नाही. गौडा यांनी जिल्ह्यात तीन वर्षांहून अधिक काळ सेवा केली आहे. गौडा यांच्याकडून पंत यांना कार्यभार स्वीकारण्याचे आदेश देण्यात आले आहेत.

वसुमना पंत यांच्या बदलीनंतर नागपूर महानगरपालिकेच्या अतिरिक्त आयुक्तपदी छत्रपती संभाजीगर जिल्हा परिषदेचे मुख्य कार्यकारी अधिकारी अंकित यांची नियुक्ती करण्यात आली आहे. वसुमना पंत यांनी नागपूर महापालिरेच्या अतिरिक्त आयुक्त म्हणून काम करीत असताना शहर स्वच्छता, आरोग्य, घनकचरा व्यवस्थापन आणि नागरी सेवा सुधारण्यासंबंधी अतिशय उत्तम कामगिरी केली. शहरात 'डीप क्लीनिंग' मोहीम, इको-फ्रेंडली गणपती उत्सव आणि आरोग्य जागृती उपक्रम अतिशय प्रभावी पद्धतीने राबवले.

सनदी अधिकारी वसुमना पंत या महाराष्ट्र केडरच्या २०१७ बॅचच्या आयएएस (IAS) अधिकारी आहेत. सध्या त्यांच्याकडे नागपूर महानगरपालिकेच्या अतिरिक्त आयुक्तपदाची जबाबदारी होती. त्यांनी दिल्ली विद्यापीठातून अर्थशास्त्रात एमए. केले असून, प्रशासकीय कारकीर्दीत जिल्हा परिषदेच्या मुख्य कार्यकारी अधिकारी, सहायक जिल्हाधिकारी, सहायक सचिव, अतिरिक्त सहायक जिल्हाधिकारी अशा अनेक महत्त्वाच्या पदांवर त्यांनी काम केले आहे.