जळगाव पोलीस पेट्रोल पंप अपहार प्रकरण: फरार PSI वाल्मिक वाघ पोलिसांना शरण

पोलिसांनी त्यांच्यासह त्यांचा मुलगा शेखर वाघ याला अटक केली आहे. पोलीस दलाच्या मानव संसाधन विभागामार्फत चालविल्या जाणाऱ्या दक्षता पेट्रोलपंपाच्या दैनंदिन आर्थिक व्यवहारांची जबाबदारी व्यवस्थापक म्हणून वाल्मीक वाघ यांच्याकडे होती. तपासात त्यांनी सुमारे १ कोटी ३३ लाख ७५२ रुपयांचा अपहार केल्याचे समोर आले होते.

अपहार समोर आल्यानंतर त्यांच्याविरुद्ध फसवणुकीचा गुन्हा दाखल करण्यात आला. दरम्यान, वाघ यांनी चौकशीत इतक्या मोठ्या रकमेचा नव्हे तर केवळ १० ते १५ लाख रुपयांचा अपहार केल्याचा दावा केला आहे. पोलिसांकडून अपहाराची रक्कम नेमकी किती आणि ती कशाप्रकारे वापरली याबाबत सखोल तपास सुरू आहे.

वाघ पिता-पुत्राला न्यायालयात हजर केले असता न्यायालयाने दोघांना चार दिवसांची पोलीस कोठडी सुनावली. अपहाराची रक्कम नेमकी किती आणि कुठे खर्च केली, याबाबतची चौकशी पोलीस कोठडीत होईल.