Pahalgam Attack: पहलगाम हल्ल्यात मोठं अपडेट, तपास यंत्रणा थेट जालन्यात, त्या कुटुंबाकडे का केली चौकशी?

जालना: काश्मीरमधील पहलगाम येथे झालेल्या दहशतवादी हल्ल्यानंतर संपूर्ण देश स्तब्ध आहे. तब्बल 26 निष्पाप नागरिकांचा गोळ्या झाडून खून करणाऱ्या दहशतवाद्यांना शोधण्याचे काम तपास संस्थांकडून केले जात आहे. या घटनेचा तपास देखील उच्चस्तरीय पातळीवर सुरू आहे. पहलगाम येथे आलेल्या पर्यटकांची तसेच स्थानिकांची चौकशी सुरू आहे. आता या प्रकरणात जालन्यातील राऊत कुटुंबाची चौकशी झाल्याची माहिती आहे.

जालन्यातील राऊत कुटुंब देखील पर्यटनासाठी पहलगाम येथे गेले होते. 21 एप्रिल रोजी ते पहेलगाम इथेच थांबले होते. दहशतवादी हल्ल्यानंतर तपास यंत्रणांनी दहशतवाद्यांचे स्केचेस जारी केले. यातील एका दहशतवाद्याने आपल्याशी संवाद साधल्याचा दावा आदर्श राऊत यांनी केला होता. त्यानंतर दहशतवाद विरोधी पथक जालन्यात दाखल झाले आणि त्यांनी राऊत कुटुंबाकडे चौकशी केली.

दहशतवाद विरोधी पथकाने जालना येथे येऊन एक ते दीड तास राऊत कुटुंबाची चौकशी केल्याची बाब समोर आली आहे. तपास संस्थांना आवश्यक असलेली सर्व माहिती पुरवली असून आगामी काळात काही मदत लागल्यास ती करण्यास तयार असल्याचं आदर्श राऊत यांनी सांगितलं.