रद्दीत जाणाऱ्या वह्यांच्या पानांचा असाही पुनर्वापर, शिक्षकाने तयार केले घरीच नोटपॅड

100 क्लब शिक्षक ऑफ जालना या शिक्षक समूहाच्या माध्यमातून पर्यावरण संवर्धनासाठी 'कागद वाचवा झाडे वाचवा' या उपक्रमांतर्गत ज्या वह्या पालक, विद्यार्थी विकतात त्या आम्ही गोळा करण्याचे काम करतो. रद्दीमध्ये विकल्या जाणाऱ्या वह्यांमध्ये मोठ्या प्रमाणावरती कोरे पाने असतात. ही कोरे पाने रद्दीमध्ये विकल्या जातात आणि म्हणून कुठेतरी पर्यावरण संवर्धनासाठी काम करत असताना इकडे रद्दीत वाया जाणारे पाने बघून मन विचलित झालं. आपण कुठेतरी या रद्दीमध्ये जाणाऱ्या कोऱ्यापानांचा पुनर्वापर आपल्याला करता येईल का? या अनुषंगाने विचार केला. मग हे आव्हान समोर घेऊन आम्ही वेगवेगळ्या विद्यार्थ्यांना पालकांना भेटलो आणि त्यांच्याकडे ज्या काही वर्ष समाप्तीनंतर वह्या आहेत. त्या वह्यामध्ये त्यांच्याकडे कोरे पान असतील चार, दहा, पाच, वीस, पंचवीस असे सगळे कोरे पान जमा केले, असं शिक्षक राजेभाऊ मगर सांगतात.