छत्रपती शिवाजी महाराजांना देणार हटके मानवंदना, शिवराज्याभिषेक सोहळ्यानिमित्त कोल्हापूरची धावपटू 300 किलोमीटर धावणार

छत्रपती संभाजी राजे आणि छत्रपती संयोगिता राजे भोसले यांच्या मार्गदर्शनाखाली तिने कोल्हापूर ते रायगड असा 300 किलोमीटरचा धावण्याचा प्रवास सुरू केला. रायगड समितीच्या अध्यक्षा संयोगिता राजे छत्रपती यांचा मार्गदर्शन आणि त्यांनी वेळोवेळी केलेली मदत यामुळेच मी 300 किलोमीटरचा प्रवास पूर्ण करू शकते, असं मत धावपटू आसमा कुरणे हिने व्यक्त केले.

कोल्हापूरची कन्या, ताराराणीची लेक, छत्रपती शाहू महाराजांच्या भूमीत जन्मल्याचा मला खूप अभिमान आहे. या हिमतीवरचं कोल्हापूर ते रायगड पर्यंतचा प्रवास मी धावत करणार असल्याचे देखील आसमा कुरणे हिने सांगितलं आहे.

कोल्हापूर ते रायगड धावत असताना रखरख्त ऊन असल्याने डीहायड्रेशन बॉडीमध्ये होत आहे. पायाचे कातडे उन्हाच्या झळामुळे गेले आहेत. त्याचबरोबर पायाला फोड येऊन त्यामध्ये पाणी देखील झाले आहे. उन्हात पळाल्यामुळे पायाला गोळे देखील येत आहेत. त्याचबरोबर घशाला देखील फोड आले आहेत त्यामुळे पाणी देखील पिता येत नसल्याचे आसमा कुरणे सांगितलं. मात्र आपल्या राजाला हे अनोखी 300 किलोमीटर धावून मानवंदना देण्यासाठीचा प्रयत्न असल्याने ती धावणार आणि पाच तारखेपर्यंत हा तीनशे किलोमीटरचा प्रवास पूर्ण करणार असल्याचे देखील तिने सांगितलं आहे. उन्हामुळे होणाऱ्या त्रासाला न हरता तिने यावर देखील पर्याय काढला आहे ती आजपासून संध्याकाळी धावण्यास सुरुवात करणार आहे, असे देखील तिने सांगितलं आहे.