कलेने ओलांडल्या सीमेच्या भिंती, मराठी कलाकाराची मोठी झेप, थेट चीनमध्ये होणार चित्र प्रदर्शन

छत्रपती संभाजीनगर : भारतात मानल्या जाणाऱ्या 64 कलांपैकी एक कला म्हणजे चित्रकला होय. आपल्या कुंचल्याच्या जादूने अनेकांना भुरळ घालणारे दिग्गज चित्रकार आपल्याकडे घडले. अशाच एका छत्रपती संभाजीनगरमधील चित्रकाराने भौगोलिक सीमेच्या भिंती ओलांडल्या आहेत. प्राचार्य रवींद्र तोरवणे यांच्या चित्रांचे प्रदर्शन थेट चीनमधील जगप्रसिद्ध संग्रहालयात होणार आहे. 6 जून ते 14 जून या कालावधीमध्ये हे प्रदर्शन बीजिंगमधील गुओ चूआंग कला संग्रहालयात होईल.

छत्रपती संभाजीनगर शहरातील यशवंत कला महाविद्यालयाचे रवींद्र तोरवणे हे प्राचार्य आहेत. रवींद्र तोरवणे सांगतात की, "माझे वडील हे कलाशिक्षक होते. त्यामुळे मला लहानपणापासूनच चित्रकलेची आवड होती. त्यामुळे मी चित्र काढायला सुरुवात केली. विविध प्रकारची चित्रे रेखाटली. आता आठ चित्रांची निवड चीनमधील बीजिंगच्या गुओ चूआंग कला संग्रहालयातील प्रदर्शनामध्ये करण्यात आलेली आहे. इथे विविध देशांतील चित्रकार उपस्थिती लावणार आहेत."

दरम्यान, एवढ्या मोठ्या ठिकाणी माझ्या चित्राचे प्रदर्शन भरणार आहे, याचा मला खूप अभिमान आहे. भविष्यात मला माझ्या चित्रांचे प्रदर्शन हे आंतरराष्ट्रीय पातळीवर सुरूच ठेवयाचे आहे. त्यांना देखील आपली भारतीय संस्कृती कळाली पाहिजे. यासाठी माझे प्रयत्न असल्याचेही तोरवणे यांनी सांगितले.