बळीराजाच्या आनंदावर विरजण, 2 मोठ्या संकटांचं पोळ्यावर सावट!

पोळा सण 'बळीराजा'साठी सर्वांत महत्त्वाचा सण समजला जातो. अतिशय जिव्हाळ्याचा, पारंपरिक अन् लोकसंस्कृतीचा वारसा असलेला हा सण यंदा महागाई सोबतच लम्पीच्या प्रार्दुभाव आणि दुष्काळाच्या सावटाखाली दबला आहे. मागील वर्षीच्या तुलनेत यंदा महागाई वाढल्याने बैलांच्या सजावटीसाठी लागणाऱ्या आवश्यक साहित्यांचे दर 20 ते 30 टक्क्यांनी वाढले आहेत. सिंधी बाजारात तसेच जिल्ह्यात विविध ठिकाणी भरलेल्या आठवडे बाजारात पोळ्यासाठी विविध साहित्याची दुकाने सजली असली तरी मागील वर्षाच्या तुलनेत दुकानदारांसह खरेदीदारांची गर्दी जेमतेम असल्याने व्यवसायिक देखील अडचणीत आले आहेत.

मागील चार दिवसांपासून मी मामा चौकात दुकान लावलेलं आहे. लंपी रोगाने आमच्या धंद्याची वाट लागली आहे. यंदा पाऊस पण खूप कमी आहे. त्यामुळे पाहिजे त्या प्रमाणात साहित्याची विक्री होत नाहीये. दोन दिवसांपूर्वी आलेल्या पावसामुळे सध्या विक्री बरी आहे. मात्र तरी मागील वर्षीच्या तुलनेत शेतकरी फारच कमी खर्चात पोळ्याचे साहित्य खरेदी करता असल्याचं विक्रेते विशाल ठाकुर यांनी सांगितले.

पाऊस कमी झाल्याने शेतकरी अडचणीत असतानाच पोळा सण आला आहे. त्यातच लम्पी रोग वाढत आहे. त्यामुळे यंदा जास्त काही उत्साह नाही आहे. दरवर्षी मी भरपूर साज बैलांना घ्यायचो. पण यंदा जरा कमी साहित्य घेतलं. पुढे पीक पाणी कसं राहिलं हे आताच सांगता येत नाही. त्यामुळे सगळेच शेतकरी चिंतेत असल्याचे वंजार उम्रदचे शेतकरी विष्णू सहारे यांनी सांगितले.