Shirdi: अपहरण, खून आणि डेडबॉडी टायर टाकून जाळून टाकली, शिर्डीत क्राईम सीरिजला लाजवेल असं हत्याकांड उघड

10 डिसेंबर 2025 रोजी  शिर्डीच्या हॉलीडे पार्क परिसरात राहणाऱ्या मयत सचिन कल्याणराव गिधे हा तरुण साई सुनिता हॉटेलमध्ये जेवणासाठी गेला होता. त्यावेळी आरोपी प्रवीण वाघमारे याने सचिनच्या बायकोला फोन करून 'तुझा  नवरा माजला आहे, त्याचे हातपाय तोडावे लागतील' अशी धमकी दिली होती. त्यानंतर सचिन गिधे हा बेपत्ता झाला होता. १५ डिसेंबर रोजी त्याच्या पत्नीने या प्रकरणी पोलिसांकडे तक्रार दाखल केली. त्यावरून गुन्हा दाखल करण्यात आला. मागील २० दिवसांपासून पोलिसांना सचिन गिधे कुठे असेल याचा शोध लावण्याचे मोठे आव्हान होतं.

आरोपींना अटक केल्यानंतर पोलीस चौकशी सुरू केली असता दीपक पोकळेनं हत्येची कबुली दिली. अनैतिक संबंध आणि पैशाच्या वादातून सचिन गिधे याची हत्या केली होती.  दीपक पोकळे, गणेश दरेकर, प्रवीण वाघमारे आणि कृष्णा वाघमारे या चौघांनी मिळून सचिन गिधेचा निर्घृणपणे खून केला. पुरावे नष्ट करण्यासाठी सचिनच्या मृतदेहावर टायर टाकले आणि डिझेल ओतून प्रेत जाळून टाकलं. या खुनासाठी त्यांनी विना नंबर प्लेटची १५ लाख किंमतीची स्कॉर्पिओ गाडी वापरली होती, पोलिसांनी ती जप्त केली आहे.

आरोपी दीपक पोकळे हा सराईत गुन्हेगार आहे. त्याच्यावर  मोक्का, खून, खुनाचा प्रयत्न, दरोडा आणि जबरी चोरी यासारखे तब्बल 17 गंभीर गुन्हे दाखल आहेत. शिर्डी, राहता आणि कोपरगाव परिसरात त्याची दहशत होती. ही दहशत मोडीत काढत स्थानिक गुन्हे शाखेनं दीपक पोकळे या गुंडाला अखेर बेड्या ठोकल्या आहे.  या हत्येचा पुढील तपास राहाता पोलीस करत असून आरोपींकडून आणखी गुन्हे उघडकीस येण्याची शक्यता आहे.