ॲडव्हेंचर बाईकसाठी आता बाहेर जायची गरज नाही, कोल्हापुरात मिळतेय ही सुविधा, तरुणाने बनवला भन्नाट STUDIO

जेव्हा बाईक रिस्टोरेशन आणि मॉडिफिकेशनमध्ये काम करायला सुरुवात केली तेव्हा या सगळ्या गोष्टी आल्हाद आधीपासून घरातच करत होता. मात्र, लोकांना आपलं काम दिसलं पाहिजे, असे वाटत असल्यामुळे एक डिझाईन स्टुडिओ सुरू करण्याची कल्पना आली होती. मात्र, फक्त एक डिजाईन स्टुडिओ न राखता एक डिटेलिंग स्टुडिओही त्याने बनवला. त्यातूनच या स्टुडिओची सुरुवात झाली. साधारणपणे 2019 सालीच याची कल्पना डोक्यात होती. मात्र, 2020 साली कोरोना महामारी आणि इतर काही कारणांमुळे ती कल्पना सत्यात उतरवता आली नाही. पण शेवटी 2024 मध्ये नव्या जोमात या स्टुडिओची सुरुवात केली असल्याचे आल्हाद सांगतो.

या स्टुडिओमध्ये चार चाकी गाड्यांचे फोम वॉशिंग, पॉलिशिंग, सिरॅमिक कोटिंग, इंटिरियर डीप क्लीनिंग, पीपीएफ, इंजिन क्लिनिंग अशा अनेक सुविधा दिल्या जातात. तर दुचाकी गाड्यांसाठी देखील पॉलिशिंग, फोम वॉशिंग, बाईक डीप क्लीनिंग अशा सुविधा दिल्या जातात. तर बाईकच्या स्पेशल ॲक्सेसरीज हा आमचे मुख्य लक्ष आहे. बाईकसाठी लागणाऱ्या विविध ॲसेसरीज बनवण्यासाठी थ्रीडी प्रिंटरचा वापर करून स्वतः डिझाईन केलेले काही बाईकचे पार्ट्स या स्टुडिओमध्ये बसवले जातात. ते पार्ट्स बाईकवर टेस्ट करूनच मग ते लोकली बनवून घेतले जातात. हे पार्ट्स ऑनलाईन आणि ऑफलाईन दोन्ही पद्धतीने विकले जातात, अशी आपल्या स्टडियोची खासियत असल्याची माहिती आल्हादने दिली.

कोणत्याही अडव्हेंचर बाईकसाठी ॲसेसरीज बनवताना सुरुवातीला नेमकी गरज काय, हे पाहिले जाते. त्यानंतर त्या बॉडी पार्टच्या डिझाईन वर विचार केला जातो. डिझाईन करताना तो पार्ट बाईकच्या बाहेर जाता कामा नये, तो बाईकला सुट झाला पाहिजे, याची काळजी घेतली जाते. त्यानंतर बाईकवरच त्या बॉडी पार्टसाठी मोजमाप करुन डिझाईन बनवली जाते. 3D प्रिंटर मशीनने तो पार्ट बनवला जातो. तयार पार्ट पुन्हा बाईकला बसवून टेस्टिंग केले जाते. त्यानंतर लेजर कटिंगमध्ये सेम पार्ट मेटलचा बनवला जातो, असेही आल्हादने सांगितले.