यंदा काय आहे गणेश मूर्तींचा ट्रेंड? पाहा कुंभार गल्ल्यांमधील लगबग, Video

कोल्हापूर शहरात बापट कँप, शाहूपुरी कुंभार गल्ली, पापाची तिकटी, गंगावेश आदी अनेक ठिकाणी गणेशमूर्ती बनवण्याचे काम चालते. येथील अनेक कुंभार बांधव पिढ्यानपिढ्या सुंदर अशा गणेश मूर्ती बनवण्याचे काम करत आले आहेत. यावेळी अधिक श्रावण महिना आल्यामुळे कामा साठीही थोडा जास्तीचा वेळ मिळाला आहे. मात्र तरीही मूर्ती बाहेर पाठवत असल्याने वेळेत काम पूर्ण करावेच लागत असल्याचे येथील कारागिरांनी सांगितले आहे.

कोल्हापूरच्या शाहूपुरी कुंभार गल्लीमध्ये अनेक कुंभार राहतात. गेली कित्येक वर्षे ते इथे गणेशमूर्ती घडवण्याचे काम करत आहेत. गेली 30 वर्षांहून अधिक वर्षे गणेशमूर्ती बनवणारे मोहन आरेकर हे त्यापैकीच एक आहेत. त्यांच्याकडे शाडू माती आणि प्लास्टर ऑफ पॅरिसचे मिश्रणापासून बनवलेल्या 1.5 ते 5 फुटांपर्यंतच्या गणेशमूर्ती मिळतात. इतरांप्रेमाणेच त्यांचे सर्व कुटुंबीयही हेच काम करत असते. दरवर्षी किमान 1 हजार मूर्ती ते बनवून विकत असतात.

पावसाच्या दिवसात मूर्तींचे काम अर्ध्यावर राहण्याची शक्यता असते. त्यामुळे सध्या कुंभार बांधवांकडे मोल्डिंगचे काम हे जवळपास 90 टक्के पूर्ण झाले आहे. तर मूर्तींना रंग देण्याचेही काम गेले महिनाभरापासून सुरू असून तेही काम जवळपास 40 ते 50 टक्के काम पूर्ण झाले आहे. तर गणेशोत्सवाला आता अगदी 50 पेक्षाही कमी दिवस शिल्लक राहिल्याने शिल्लक कामही लवकरच पूर्ण होईल, असेही आरेकर म्हणाले

कोल्हापुरातून गणेशमूर्ती या महाराष्ट्रातील अनेक शहरांसह बाजूच्या गोवा, कर्नाटक या राज्यामध्ये देखील पाठवल्या जातात. यामध्ये ऑर्डर करण्यात आलेल्या मूर्तींपैकी 30 ते 40 टक्के पाठवण्यात आलेल्या आहेत. तर बाकीच्या बाहेर जाणाऱ्या मूर्ती गोकुळाष्टमी पर्यंत पाठवल्या जाणार आहेत.

सर्वसामान्यतः मूळ रुपातल्या गणेशमूर्ती लोकांना जास्त आवडतात. पण सध्या नवी एक आवड लोक जोपासू लागलेत. आपल्या गणपती बाप्पाला जितके खरे रूप देता येईल तितके ते त्यांना आवडते. त्यामुळेच मूर्तीला खरे धोतर, उपरणे, फेटा नेसवता येईल अशा मूर्तींना सध्या स्थानिक पातळीवर मागणी वाढू लागली आहे, असे आयरेकर यांनी सांगितले. दरम्यान, हीच परिस्थिती सध्या कोल्हापूर शहर आणि जिल्ह्यातील इतर कुंभार वस्त्यांमध्ये पाहायला मिळत आहे. कुंभार बांधवांचे हात हे गणेश मूर्तींवर लगबगीने फिरू लागलेत.