आता कुंडीत वाढवा डेरेदार वृक्ष, बोन्साय बद्दल माहितीये का? जाणून घ्या सविस्तर Video

कोल्हापूर : झाडे ही आजची सर्वात महत्त्वाची गरज आहे. बऱ्याच ठिकाणी मोकळ्या जागेत वृक्षारोपण केले जाते. पण शहरीकरणामुळे सध्या जागेचा अभाव जाणवू लागला आहे. त्यामुळे बोनसायची संकल्पना अशा वेळी उपयुक्त ठरते. आपल्याला हव्या त्या मोठ्या बुंध्याच्या झाडांचे बोन्साय बनवता येते. अगदी मोठ्या डेरेदार वृक्षांप्रमाणेच हे झाड एका छोट्या कुंडीत वाढते. त्यामुळे ते झाड आपल्या बाल्कनीत, अंगणात किंवा परसात देखील लावू शकतो. याच बोन्साय बद्दल कोल्हापुरातील एका नर्सरी चालकाने माहिती दिली आहे.

कोल्हापुरात कळंबा येथे दत्तात्रय कासोटे हे गेली वीस वर्षे नर्सरी व्यवसाय करतात. त्यांच्या साईप्रसाद बायोटेकमध्ये विविध प्रकारची सामान्य झाडे, फळझाडे, फुलझाडे, शोभेची झाडे त्याचप्रमाणे शेतीसाठी लागणाऱ्या रोपांचा पुरवठा केला जातो. या नर्सरीमध्ये बोन्साय सुद्धा बनवला जातो. वड, पिंपळ, उंबर, आंबा यासारख्या रोपांचेही बोन्साय बनवले जातात, असे दत्तात्रय कासोटे सांगतात.