Trending:

Maharashtra: बारावीच्या निकालाची तारीख बदलली, कधी लागणार बोर्डाचा रिजल्ट?

Published by:Ravindra Mane

Last Updated:May 03, 2025 7:37 AM IST

SSC-HSC Board Exam Result 2025: फेब्रुवारी-मार्च २०२५ मध्ये घेतलेल्या इयत्ता दहावी आणि बारावीच्या परीक्षांच्या निकालाचे कामकाज अंतिम टप्प्यात आले असून बोर्डाचा निकाल कधी लागणार याची तारीख समोर आली आहे.

राज्य माध्यमिक व उच्च माध्यमिक शिक्षण मंडळामार्फत फेब्रुवारी-मार्च २०२५ मध्ये घेतलेल्या इयत्ता दहावी आणि बारावीच्या परीक्षांच्या निकालाचे कामकाज अंतिम टप्प्यात आले आहे. या दोन्ही बोर्ड परीक्षांचा निकाल मे महिन्याच्या पहिल्या आठवड्यात लागेल, असं सांगण्यात येत होतं. मात्र आता बोर्ड परीक्षेच्या निकालाबाबत महत्त्वाची अपडेट समोर आली आहे. बारावीच्या परीक्षेचा निकाल मे महिन्याच्या पहिल्या आठवड्याऐवजी मे महिन्याच्या दुसऱ्या आठवड्यात शेवटी लागू शकतो, असं सांगितलं जात आहे.

येत्या १५ मेपर्यंत दोन्ही परीक्षांचे निकाल जाहीर होतील, अशी माहिती राज्य मंडळाचे अध्यक्ष शरद गोसावी यांनी दिली. दहावी, बारावीच्या लेखी परीक्षा दरवर्षीपेक्षा यंदा दहा दिवस लवकर सुरू झाल्या होत्या. विद्यार्थ्यांना पुढील करिअरच्या दृष्टीने नियोजनासाठी पुरेसा वेळ मिळावा म्हणून परीक्षेसोबतच निकालदेखील लवकर जाहीर केला जाणार आहे.

बारावीच्या लेखी परीक्षेला ११ फेब्रुवारीपासून तर, दहावीच्या लेखी परीक्षेला २१ फेब्रुवारीपासून सुरुवात झाली होती. सध्या सर्व विभागीय मंडळाच्या निकालाचा एकत्रित आढावा घेण्याचे काम सुरू आहे. साधारणपणे ५ मे ते १० मेदरम्यान बारावीचा निकाल जाहीर होईल. तर, १५ मेपर्यंत दहावीचा निकाल जाहीर होणार असल्याचं बोर्डाकडून सांगण्यात आलं आहे.

विद्यार्थ्यांचं मूल्यांकन कसं होणार?

महाराष्ट्र बोर्डाच्या दहावी-बारावीच्या परीक्षेत उत्तीर्ण होण्यासाठी विद्यार्थ्यांना प्रत्येक विषयात एकूण ३५ टक्के गुण मिळवणे आवश्यक आहे. विद्यार्थ्यांना गुणांसह ग्रेड देखील मिळतील. ग्रेडिंग सिस्टीमनुसार, ७५ टक्के आणि त्याहून अधिक गुण मिळवणाऱ्यांना डिस्टिंक्शन मिळणार आहे. ६० टक्के आणि त्याहून अधिक गुण मिळवणाऱ्यांना प्रथम श्रेणी मिळेल. ४५ टक्के ते ५९ टक्के गुण मिळवणाऱ्यांना द्वितीय श्रेणी मिळेल. उत्तीर्ण होण्यासाठी ३५ पेक्षा जास्त गुण हवे. ज्या विद्यार्थ्यांना हे किमान गुणही मिळू शकणार नाहीत त्यांना पुन्हा पुरवणी परीक्षेला बसावे लागेल.