Local Body Election: मतदानाच्या आदल्या रात्रीपर्यंत प्रचाराची धामधूम, निवडणूक आयोगाचा नेमका निर्णय काय?

Published by:Shrikant Bhosale

Last Updated:November 28, 2025 2:47 PM IST

Maharashtra Local Body Election : स्थानिक स्वराज्य संस्थांच्या निवडणुकांची धामधूम शिगेला असताना राज्य निवडणूक आयोगाने उमेदवारांसाठी दिलासा देणारा महत्त्वपूर्ण निर्णय जाहीर केला आहे.

मतदानाच्या आदल्या रात्रीपर्यंत प्रचाराची धामधूम, निवडणूक आयोगाचा नेमका निर्णय काय?

मुंबई : स्थानिक स्वराज्य संस्थांच्या निवडणुकांची धामधूम शिगेला असताना राज्य निवडणूक आयोगाने उमेदवारांसाठी दिलासा देणारा महत्त्वपूर्ण निर्णय जाहीर केला आहे. आगामी 2 डिसेंबरला होणाऱ्या मतदानापूर्वी प्रचारासाठीची वेळ वाढवण्यात आली असून, आता उमेदवारांना 1 डिसेंबरच्या रात्री 10 वाजेपर्यंत प्रचार करण्याची परवानगी देण्यात आली आहे. आयोगाच्या या नव्या आदेशामुळे मतदानाच्या आधीच्या अंतिम दिवशी मतदारांपर्यंत पोहोचण्याचा उमेदवारांना अधिक अवधी मिळणार आहे.

आयोगाने जारी केलेल्या मार्गदर्शक सूचनांनुसार, यापूर्वी मतदानाच्या दिवसापूर्वीच्या 24 तासांपासून सर्व प्रकारचे प्रचारकार्य पूर्णतः बंद राहायचे. यात सभा, जाहीर मोर्चे, ध्वनिक्षेपकांचा वापर, तसेच वृत्तवाहिन्या आणि सोशल मीडियावरील निवडणूक जाहिरातींवरही प्रतिबंध होता. या मर्यादा उमेदवारांसाठी विशेषतः शेवटच्या क्षणी प्रचाराच्या दृष्टीने महत्त्वाच्या ठरत होत्या.

अपक्ष उमेदवारांना निवडणूक चिन्ह वाटप उशिराने करण्यात आले. त्यामुळे प्रचाराला अवधी मिळालाच नसल्याची तक्रार करण्यात आली होती. अखेर निवडणूक आयोगाने अपक्ष उमेदवारांना दिलासा देण्याचा प्रयत्न केला आहे. निवडणूक आयोगाने नियमांमध्ये सशर्त शिथिलता देण्याचा निर्णय घेतला आहे. 1 डिसेंबर रोजी रात्री 10 वाजेपर्यंत प्रचार परवानगी मिळाल्याने उमेदवारांना अंतिम दिवशी सभा, पदयात्रा, घर-दार संपर्क मोहिमा आणि सोशल मीडियाद्वारे आपला संदेश पोहोचवण्याची अतिरिक्त संधी उपलब्ध झाली आहे.

३५ जागांवरील निवडणूक स्थगित...

राज्य निवडणूक आयोगाने १२ जिल्ह्यांतील नगरपालिका आणि नगरपंचायतीतील ३५ जागांवरील निवडणुका पुढील आदेशापर्यंत स्थगित केल्या आहेत. त्यामुळे २ डिसेंबर रोजी होणारे मतदान रद्द झाले आहे. छाननीदरम्यान निवडणूक निर्णय अधिकाऱ्यांनी घेतलेल्या निर्णयांविरोधात संबंधित ३५ जागांवरील उमेदवारांनी जिल्हा न्यायालयात याचिका दाखल केल्या होत्या. या याचिकांवर २५ नोव्हेंबरपर्यंत निकाल लागणे अपेक्षित होते; मात्र अंतिम निर्णय न झाल्याने पुढील कार्यवाही ठप्प झाली आहे. न्यायालयाचे आदेश न मिळाल्याने या प्रभागांमध्ये उमेदवारांना निवडणूक चिन्हांचं वाटपच शक्य नसल्याने मतदान अनिश्चित काळासाठी पुढे ढकलल्याचे निवडणूक आयुक्त दिनेश वाघमारे यांनी स्पष्ट केले.

इतर महत्त्वाची बातमी:

Suprme Court On Local Body Election: स्थानिक स्वराज्य संस्था निवडणुकीवर सुप्रीम कोर्टातून मोठी अपडेट, निवडणूक कार्यक्रम...

view comments