Maharashtra Elections Dhule : मतदानासाठी मतदान केंद्रावर पैसे वाटपाचा आरोप, तरुणाला बेदम मारहाण

राज्यात आज विधानसभेच्या 288 जागांवर आज मतदान पार पडत आहे. तर, दुसरीकडे पैसे वाटपाच्या आरोपात एका तरुणाला बेदम मारहाण करण्यात आली. धुळे शहरातील संभाजीनगर भागातील मतदान केंद्रावर ही घटना घडली. मतदान केंद्राबाहेर तरुणाला चोप दिल्याने काही काळ तणाव निर्माण झाला. मारहाण होत असल्याचे पाहून पोलिसांनी तात्काळ हस्तक्षेप करत तरुणाला पोलिसांनी ताब्यात घेतले.

हा व्यक्ती कोण होता, याची माहिती समोर आली नाही. हा तरुण भाजपचा कार्यकर्ता असल्याचा आरोप करण्यात आला. मात्र, त्यावर कोणतीही पुष्टी झाली नाही. तरुणाकडे लॅपटॉप असल्याची माहिती समोर आली. या तरुणाला पोलिसांनी ताब्यात घेतले असून पुढील तपास सुरू आहे. दरम्यान, सध्या परिस्थिती पूर्णपणे नियंत्रणात असून कोणताही अनुचित प्रकार घडला नाही.