Eknath Shinde : भाजपवर शिवसेनेचे दबावतंत्र? ''आमच्या नेत्याचा सन्मान ठेवून...'',शिंदेच्या शिलेदाराचं थेट आवाहन

Published by:Shrikant Bhosale

Last Updated:Nov 29, 2024 2:15 PM IST

Maharashtra Government Formation : माजी खासदार राहुल शेवाळे यांनी भाजपला एकनाथ शिंदे यांचा सन्मान ठेवण्याचे आवाहन केले. मागील दोन दिवसातील घटनाक्रम पाहता शिवसेना शिंदे गटाने आता भाजपवर दबावतंत्र सुरू केले असल्याची चर्चा सुरू झाली आहे.

भाजपवर शिवसेनेचे दबावतंत्र? ''आमच्या नेत्याचा सन्मान ठेवून...'',शिंदेच्या शिलेदाराचं थेट आवाहन

प्रशांत लीला रामदास, प्रतिनिधी, नवी दिल्ली : नुकत्याच झालेल्या विधानसभा निवडणुकीत प्रचंड बहुमत मिळालेल्या महायुतीमध्ये सत्ता स्थापनेवरून घोळ सुरू असल्याचे चित्र आहे. महायुतीच्या नेत्यांची आज बैठक होणे अपेक्षित असताना दुसरीकडे काळजीवाहू मुख्यमंत्री एकनाथ शिंदे हे त्यांच्या साताऱ्यातील मूळ गावी गेले आहेत. तर, शिवसेना शिंदे गटाने दिल्लीत पत्रकार परिषद घेत भाजपला आवाहन केले आहे. माजी खासदार राहुल शेवाळे यांनी भाजपला एकनाथ शिंदे यांचा सन्मान ठेवण्याचे आवाहन केले. मागील दोन दिवसातील घटनाक्रम पाहता शिवसेना शिंदे गटाने आता भाजपवर दबावतंत्र सुरू केले असल्याची चर्चा सुरू झाली आहे.

महायुतीची दोन दिवसात बैठक...

शिवसेना शिंदे गटाचे माजी खासदार राहुल शेवाळे यांनी म्हटले की, काल दिल्लीत ही बैठक अमित शाह यांच्यासोबत बैठक झाली. ही बैठक सकारात्मक झाली. महाराष्ट्राच्या विकासाच्या अनुषंगाने ही सकारात्मक बैठक झाली. राज्याचे काळजीवाहू एकनाथ शिंदे यांचा आदर राखून पुढचे निर्णय घेतले जातील अशी अपेक्षा त्यांनी व्यक्त केली. आज महायुतीची बैठक होती. मात्र, भाजपच्या विधिमंडळ पक्षाची बैठक झाल्यानंतर ही बैठक 2 दिवसात होईल अशी माहितीदेखील शेवाळे यांनी दिली.

राहुल शेवाळे यांनी म्हटले की, विधानसभेची निवडणूक एकनाथ शिंदे यांच्या नेतृत्वात लढवली आणि त्याला यश आलं. त्यांच्या अडीच वर्षाच्या कारकिर्दीचे ते यश आहे. महायुतीची निवडणूक एकनाथ शिंदे यांच्या नेतृत्वात लढवली होती. यात एकनाथ शिंदे यांची महत्त्वाची भूमिका राहिली आहे. महायुतीच्या बैठकी पूर्वी एकनाथ शिंदे आणि अमित शाह यांची वैयक्तिक स्वतंत्र बैठक झाली. एकनाथ शिंदे यांनी शिवसेनेच्या ज्या काही भावना आहेत. प्रस्ताव आहेत त्या मांडल्या. आता, त्याचा आदर ठेवून निर्णय घेतला जाईल असे शेवाळे यांनी सांगितले.

निवडणूक पूर्वीच्या चर्चांची जाणीव करुन दिली...

राहुल शेवाळे यांनी म्हटले की, निवडणूकीपूर्वी ज्या काही चर्चा झाल्या होत्या. त्या चर्चांची जाणीव भाजपच्या नेत्यांना करून दिली. या पूर्वीही शिवसेनेने एनडीएचा घटक पक्ष म्हणून सहकार्याची भूमिका ठेवली आहे. या सर्व गोष्टींची जाणीव एकनाथ शिंदे यांनी करून दिली असल्याचे ही शेवाळे यांनी करुन दिली. केंद्रात सरकार स्थापन करताना शिवसेनेने सहकार्याची भूमिका ठेवली आहे. आमचा कुठला यापूर्वी आग्रह नव्हता ही जाणीव एकनाथ शिंदे यांनी करून दाखवला असल्याकडेही राहुल शेवाळेंनी म्हटले.