महायुतीत पाडापाडी होणार? भाजपविरोधात या ठिकाणी भाई-दादांच्या पक्षाकडून बंडखोरी!

विक्रमगड, चिंचवड, सांगली, जत, शिराळा, दौंडमध्ये भाजप उमेदवारांविरोधात महायुतीच्याच नेत्यांनी बंडखोरी केलीय. तर सोलापूर शहर उत्तर, मध्य आणि दक्षिण या तिन्ही मतदारसंघात महायुतीतील घटक पक्षांसह भाजपच्याच नाराजांनी पक्षाला आव्हान दिलंय.

विक्रमगड इथं शिंदेंच्या शिलेदाराने बंड पुकारलंय. तर चिंचवडमध्ये अजित पवार गटाचे नाना काटे आणि भाऊसाहेब भोईर मैदानात उतरले आहेत. सांगलीत भाजपच्याच शिवाजी डोंगरे यांनी अर्ज दाखल केलाय. जतमध्ये भाजपचेच तम्मनगौडा पाटील आहेत. तर शिराळ्यात सम्राट महाडिक यांनी बंडखोरी केलीय. दौंडमध्ये अजित पवार गटाच्या वीरधवल जगदाळे यांनी भाजप उमेदवाराविरोधात दंड थोपटले आहेत. सोलापूर शहर उत्तरमध्ये भाजपच्या तीन तर शिवसेनेच्या एका उमेदवाराने बंडखोरी केलीय. सोलापूर शहर मध्य मध्ये भाजप आणि शिंदे सेनेच्या नेत्यांनी बंड केलं आहे. तर दक्षिणमधून भाजपच्याच दोघांनी अर्ज दाखल केले आहेत.

शिवसेनेला सावंतवाडी, अलिबाग आणि खानापूर आटपाडी या मतदारसंघांमध्ये भाजपच्या बंडखोरांनी आव्हान दिलं असून उमेदवारी अर्ज दाखल केला आहेत. तर राष्ट्रवादी काँग्रेसच्या वाट्याला आलेल्या पिंपरी, मावळ, भोर, जुन्नर, शिरुर, माढा या मतदारसंघातही बंडखोरी झाली आहे. या जागांवरही महायुतीला बंडखोरांचे आव्हान असणार आहेत.