Weather Update: उत्तरेकडून येणाऱ्या वाऱ्यांमुळे महाराष्ट्रावर दुहेरी संकट! 7 जिल्ह्यांसाठी गारपिटीचा इशारा

कोकण पट्ट्यात कमालीची उष्णता वाढणार आहे. दमट आणि उष्ण हवामानामुळे हैराण होऊ शकतात. रायगड, रत्नागिरी, ठाणे, मुंबई आणि सिंधुदुर्ग या जिल्ह्यांमध्ये यलो अलर्ट हवामान विभागाकडून देण्यात आला आहे. या भागात उष्ण वारे वाहणार आहेत. तर लातूर, धाराशिव, भंडारा, चंद्रपूर, गडचिरोली, गोंदिया, नागपूर या जिल्ह्यांमध्ये वादळी वाऱ्यासह मुसळधार पाऊस राहणार आहे काही ठिकाणी गारपिटीचा अंदाज वर्तवण्यात आला आहे. वाऱ्याचा वेश ताशी 50 किमीच्या आसपास असेल.

पुणे जिल्ह्याच्या शिरूर तालुक्यातील मलठण परिसराला सलग दोन दिवस गारपिटीसह अवकाळी पावसाचा जोरदार तडाखा बसला. त्यामुळे गहू, कांदा यांसह तरकारी पिकांचं मोठ्या प्रमाणात नुकसान झालं. काढणीला आलेला गहू भुईसपाट झाल्याने शेतकऱ्यांच्या चिंता वाढल्या आहेत. वाशिमच्या मानोरा शहरासह विठोली,कारखेडा परिसराला वादळी वाऱ्यासह अवकाळी पावसानं झोडपलं.

गेल्या २४ तासांत विदर्भातील काही जिल्ह्यांत पाऊस झाला असला, तरी आज दुपारनंतर ही स्थिती बदलली आहे. आता पावसाचा हा जोर उत्तर प्रदेश, बिहार आणि झारखंडच्या दिशेने सरकत आहे. पाऊस जरी थांबला असला, तरी महाराष्ट्रात थंडीची एक छोटी लाट येण्याची शक्यता आहे. उत्तर भारतातून येणाऱ्या थंड वाऱ्यांमुळे पंजाब, हरियाणा आणि राजस्थानसोबतच महाराष्ट्रातील तापमानातही घट होऊ शकते. विशेषतः उत्तर महाराष्ट्र आणि विदर्भात रात्रीच्या तापमानात मोठी घट होऊन गारठा जाणवेल. २२ आणि २३ मार्च दरम्यान किमान तापमानात २ ते ३ अंशांची घसरण होण्याची शक्यता आहे.