Manoj Jarange Patil : 'भुजबळ अमेरिकेचे अध्यक्ष झाले तरी...', पोस्टरबाजीवरून जरांगे पाटलांचा निशाणा

नांदेड, 8 डिसेंबर : अंतरवाली सराटीमध्ये झालेल्या लाठीचार्जप्रकरणी सरसकट गुन्हे मागे घेतले जाणार नाहीत, हे गृहमंत्री देवेंद्र फडणवीस यांनी विधिमंडळात दिलेल्या लेखी निवेदनानंतर स्पष्ट झालं आहे. या घटनेमध्ये 79 पोलीस आणि 50 आंदोलक जखमी झाले. सर्व माहिती घेतल्यानंतर गुन्हे मागे घेण्याची प्रक्रिया केली जाईल, असं फडणवीस यांनी त्यांच्या लेखी निवेदनात सांगितलं. फडणवीस यांच्या या भूमिकेनंतर मनोज जरांगे पाटील यांनी प्रतिक्रिया दिली आहे.

'त्यांनी काय उत्तर दिलं ते बघतो, माझ्याकडे जे मंत्री आले होते, त्यांनी सरसकट गुन्हे मागे घेण्यात येतील, असं सांगितलं. समाजाच्या नजरेतून त्यांना पडायचं नसेल तर त्यांनी अगोदर पाठवलेल्या मंत्र्यांना विचारावं, मग लेखी उत्तर द्यावं. मग 5 हजार पोलीस जखमी व्हायला हवे होते का? तुम्ही दिलगिरी व्यक्त केली म्हणून आम्ही गप्प बसलो, मार कुणाला लागला हे तुम्हाला चांगलं माहिती आहे. आताही लोकांच्या डोक्यात गोळ्या आहेत, त्या लोकांना आम्ही सागर बंगल्यावर नेऊन दाखवतो. पाठीमागच्या भूमिकेवर त्यांनी कायम राहावं, अन्यथा त्यांचं भविष्य अडचणीत येईल, त्यांच्या नेत्यांना मराठे दाराला शिवू देणार नाहीत,' असा इशारा जरांगे पाटील यांनी दिला.