मुंबईतील प्रसिद्ध वांद्रे किल्ल्यावर दारू पार्टी, बिअर कॅन हातात घेतल्याचे फोटो

या फोटोजमध्ये लोकांच्या हातात बिअरचे कॅन दिसून येतायत. ठाकरे गट या प्रकरणावर चांगलाच आक्रमक झाला असून स्थानिक आमदार आशिष शेलारांवर निशाणा साधला आहे. तसेच पर्यटन मंत्री शंभूराज देसाई यांनाही अखिल चित्रे यांनी सुनावले आहे.

गडकिल्ल्यावर दारू पार्टी होत असताना सरकार कुठे आहे? सरकारची काही सुरक्षा यंत्रणा व्यवस्था आहे की नाही? सरकार काय झोपले आहे का? असा प्रश्नांची सरबत्ती शिवसेना ठाकरे गटाचे पदाधिकारी अखिल चित्रे यांनी केली.

दरम्यान, राज्य उत्पादन शुल्क विभागाची टीम वांद्रे किल्ल्यावर दाखल झाली आहे. पोलीस सीसीटीव्ही तपासत असून किल्ल्यावर दारू पार्टी करणाऱ्या तरुणांचा शोध घेतला जात आहे. दोषींना लवकरच पकडण्याचे आश्वासन पोलिसांनी दिले आहे.

महाराष्ट्रातील किल्ल्यांवर हे काय सुरु आहे? पोर्तुगीजांनी बांधलेल्या व नंतर ब्रिटिश आणि मराठा अशा साम्राज्यांच्या इतिहासाची साक्ष देणाऱ्या हेरिटेज वास्तू असलेल्या वांद्रे किल्ल्यावर दारूची पार्टी करण्यासाठी महाराष्ट्र सरकारचं राज्य उत्पादन शुल्क विभाग आणि मुंबई महापालिका परवानगी देतंच कसं? आणि किल्ल्यावरील ह्या दारू पार्टीसाठी संयोजक कोण तर 'महाराष्ट्र पर्यटन' विभाग ? नक्की काय सुरु आहे ? कुठे आहेत स्थानिक आमदार आणि महाराष्ट्राचे सोकॉल्ड 'सांस्कृतिक मंत्री' आशिष कुरेशी?

सुरुवात राजधानी मुंबईतील उपेक्षित किल्ल्यांपासून करायची आणि बोभाटा झाला नाही तर ह्याच दारू पार्ट्यांचे उपद्व्याप महाराष्ट्रातील इतर किल्ल्यांवर करायचे... हेच भाजपा आणि त्यांच्या नोकरपक्षांचं ढोंगी हिंदुत्व अन् लबाड संस्कृती !

(व्हिडिओ स्थानिक रहिवाशांनी, रविवारी रात्री उशिरा, १६ नोव्हेंबरच्या मध्यरात्री काढलेला आहे.)