भाई-दादांच्या होर्डिंगची हौस कर्मचाऱ्याच्या जीवावर बेतली, जागेवरच गेला जीव, घटनेचा VIDEO

छत्रपती संभाजीनगर : अलीकडे पालिका निवडणुका पार पडल्या. पण, सर्वत्र शुभेच्छा आणि अभिनंदनाच्या होर्डिंगने शहर विद्रुप केलं आहे. अनधिकृत होर्डिंग काढण्याची कारवाई सुरू असताना एका पालिकेच्या कर्मचाऱ्याला आपला जीव गमवावा लागला आहे. घटना घटनेचा धक्कादायक व्हिडीओ समोर आला आहे.

मिळालेल्या माहितीनुसार, शहरात ठिकठिकाणी अनधिकृत होर्डिंग आणि बॅनर्सनं रस्ते, चौक व्यापून टाकले आहे. मुकुंदवाडी परिसरात अनधिकृत बॅनर्स आणि होर्डिंग हटवण्याचं काम सुरू होतं.  अनाधिकृत बॅनर्स काढताना मुकुंदवाडीत महापालिका कर्मचाऱ्यांचा शॉक लागून मृत्यू झाला.  अमोल दिनकर जाधव (वय 27 रा. मुकुंदवाडी, संजयनगर ) असं मृत कर्मचाऱ्याचं नाव आहे. तर सोबत असलेला रवी रणधीर रिडलाॅन (वय 38) हा  कर्मचारी जखमी झाला आहे. जखमी कर्मचाऱ्यालाा सिग्मा हॉस्पिटलमध्ये उपचार सुरू आहेत.

मुकुंदवाडी येथील हनुमान मंदिरावर असलेले अनाधिकृत होर्डिंग्ज काढत असताना सकाळी साडेनऊ वाजता ही घटना घडली. होर्डिंगला लोखंडी फ्रेम होती. होर्डिंग्ज काढल्यानंतर अमोल जाधव आणि रवी रिडलाॅन खाली घेऊन येत होते. पण अचानक होर्डिंगचा महावितरणच्या 33 केव्ही तारेला लागलं. तारेला स्पर्श झाल्यामुळे दोघांनाही विजेचा जबर धक्का बसला. अमोल जाधव हा जागेवरच कोसळला. तर रवी हा जखमी झालाा. स्थानिकांनी तातडीने रवी रिडलॉन याला रुग्णालयात हलवलं. अमोल जाधव या कर्मचाऱ्याचाा मृत्यू झाल्यामुळे कर्मचाऱ्यांचा संतापाचा उद्रेक झाला आहे. या प्रकरणाच्या चौकशीची मागणी करण्यात आली आहे.