फार्महाऊसवर 21 जिवंत काडतुसं, अशोक खरातला बंदूक कुणी दिली? खळबळजनक माहिती समोर

मिळालेल्या माहितीनुसार, अशोक खरातने शस्त्र बाळगण्यासाठी जिल्हा प्रशासनाकडे रीतसर अर्ज केला होता. त्यानंतर १५ ऑक्टोबर २०१२ रोजी त्याला हा शस्त्र परवाना मंजूर करण्यात आला होता. धक्कादायक बाब म्हणजे, खरातच्या संशयास्पद हालचालींकडे दुर्लक्ष करत १ जानेवारी २०२४ रोजी या परवान्याचं नूतनीकरण देखील करण्यात आल्याची नोंद सरकारी दप्तरी आढळली आहे. जिल्हाधिकाऱ्यांच्या परवानगीनंतरच हा परवाना देण्यात आल्याचं आता समोर आलं आहे.

गेल्या सात दिवसांपासून सुरू असलेल्या पोलीस कोठडीतील तपासादरम्यान खरातच्या फार्महाऊसची झडती घेण्यात आली. यावेळी पोलिसांना तेथे २१ जिवंत काडतुसे मिळून आली आहेत. मात्र, तपासात असेही निष्पन्न झालं आहे की, फार्महाऊसमध्ये ५ वापरलेली काडतुसंही आढळून आली. ही पाच काडतुसे नक्की कोणावर चालवण्यात आली किंवा त्यांचा वापर शिकारीसाठी की दहशत निर्माण करण्यासाठी केला गेला, याचा तपास आता यंत्रणा करत आहेत.

भोंदू बाबा म्हणून खरातचे काळे कारनामे उजेडात आल्यानंतर आता प्रशासनाने आपली चूक सुधारण्यास सुरुवात केली आहे. खरातच्या नावावर असलेला शस्त्र परवाना तात्काळ रद्द करण्याची प्रक्रिया जिल्हा प्रशासनाने सुरू केली आहे. एका भोंदू बाबाला शस्त्राचा परवाना मिळतोच कसा, आणि त्याचे नूतनीकरण कोणत्या आधारावर केले गेले, यावरून आता प्रशासकीय वर्तुळातही प्रश्नचिन्ह उपस्थित केले जात आहेत.