Nashik Flood: नाशिकमध्ये पावसाचा कहर, गोदाकाठची मंदिरं पाण्यात, महापुराचा अलर्ट!

नाशिकमध्ये झालेल्या मुसळधार पावसामुळे गंगापूर धरणातील पाण्याची आवक वाढली आहे. त्यामुळे धरणातून गोदावरीत पाण्याचा विसर्ग वाढवला आहे. त्यामुळे पूरस्थिती निर्माण झाली असून अनेक गावांचा संपर्क तुटला आहे. तर नाशिकमधील गोदाघाटावरील सर्व मंदिरे पाण्यात गेली आहेत. पाण्याची पातळी वाढतच असून दुतोंड्या मारुतीच्या वरून पाणी वाहत आहे. पाणीपातळी आणखी वाढण्याची शक्यता असून प्रशासनाने सतर्कतेचा इशारा दिला आहे.

दरम्यान, जिल्ह्यातील येवला, नांदगाव, मनमाड, त्र्यंबकेश्वर, इगतपुरीसह इतर तालुक्यांत जोरदार पाऊस कोसळत आहे. त्याचप्रमाणे पंचवटीतील अहिल्याबाई होळकर पुलापर्यंत पाणी पोहचले आहे. टप्प्याटप्प्याने विसर्गात आणखी वाढ होण्याची शक्यता आहे. त्यामुळे गोदावरी नदीत पाण्याचे प्रमाण आणखी वाढणार असून आजूबाजूच्या दुकानदारांनी आणि गोदाकाठावरील भाजी विक्रेत्यानी याची नोंद घ्यावी. तसेच नागरिकांनी देखील योग्य ती काळजी घ्यावी, असे आवाहन करण्यात आले आहे.