Nashik News: चिंता नको! आता नाशिकरांना ३ दिवसांत मिळणार गॅस सिलेंडर, फक्त हे काम करावं लागणार

गेल्या काही दिवसांपासून नागरिकांकडून गॅस एजन्सीच्या कार्यालयाबाहेर वेळेवर गॅस सिलिंडर उपलब्ध होत नसल्यामुळे लांबच लांब रांगा लावल्या जात आहेत. अनेक नागरिक रिकामे सिलिंडर घेऊनच थेट कार्यालयाच्या बाहेर येत नंबर लावण्यासाठी येत होते. गॅस तुटवड्याबद्दल नाशिकच्या जिल्हाधिकारी कार्यालयाकडून नियंत्रण कक्षाची स्थापना केली गेली आहे. HPCL, IOC आणि BPCL या तीन कंपन्यांचे गॅस सिलिंडर बुक झाल्यानंतर साधारणत: 2 ते 3 दिवसांमध्ये घरपोच मिळणार असल्याची माहिती देण्यात आली आहे. यासोबतच जिल्हा प्रशासनाने नागरिकांना महत्त्वाचे आवाहनही केले आहे. नागरिकांनी गॅस एजन्सीच्या कार्यालयाबाहेर गर्दी करू नका आणि सोशल मीडियावर पसरवणाऱ्या अफवांवर विश्वास ठेवू नका, असं आवाहन करण्यात आले आहे.

आखाती देशातील युद्धाच्या पार्श्वभूमीवर नागरिकांनी घाईगडबडीत अतिरिक्त सिलिंडर घेण्याची गरज नाही, पुरवठा सुरळीत सुरू आहे. सोशल मीडियावर व्हायरल होणाऱ्या अफवांवर विश्वास ठेवू नये, सिलिंडरची टंचाई होईल यासाठी आधीच घाई- गडबड करू नये, असे आवाहन जिल्हा पुरवठा अधिकारी सीमा अहिरे यांनी नागरिकांना केले आहे. जर, नागरिकांना गॅस संबंधित कोणतीही अडचण असेल तर, सकाळी 8 ते रात्री 8 वाजेपर्यंत (०२५३) २३१७१५१ या क्रमांकावर संपर्क साधण्याचे आवाहनही जिल्हा पुरवठा अधिकाऱ्यांनी केले आहे.

या प्रमाणे गॅस सिलिंडर बुक केल्यास नाशिककरांनो तुम्हाला 2 ते 3 दिवसांमध्ये घरपोच गॅस मिळून जाणार आहे.