Nashik Ramjaan Eid : रमजान ईदनिमित्त नाशिकच्या वाहतुकीत बदल; 'या' मार्गावरुन वाहतूक बंद तर, 'हे' पर्यायी मार्ग खुले

मुस्लीम बांधव एकत्र येत नमाज अदा करत असतात. त्यामुळे या रस्त्यावर वाहनांची आणि नागरिकांची गर्दी होऊ नये, या दृष्टीने काही रस्ते बंद करत पर्यायी मार्गांचा वापर करण्याचे आदेश दिले.

नाशिकच्या वाहतूक पोलीसांनी दिलेल्या महितीनुसार, रमजान ईदनिमित्त उद्या त्र्यंबक रोडवरील वाहतूक मार्गात बदल करण्यात येणार आहे. शनिवारी (21 मार्च) सकाळी 7 ते दुपारी 12 वाजेपर्यंत वाहतुक मार्गांमध्ये बदल करण्यात आलेला आहे. वाहतूक शाखेच्या उपायुक्त किरथिका सी.एम. यांनी नाशिक शहरातल्या वाहतुकीच्या मार्गांमध्ये बदल करण्याचे आदेश दिलेले आहेत. त्र्यंबक नाका ते मायको सर्कल आणि गडकरी सिग्नल ते चांडक सर्कल या मार्गांवरील दोन्हीही बाजूंची वाहतूक बंद असणार आहे. शिवाय इतरत्र काही भागांतही वाहतुकीच्या मार्गांमध्ये बदल करण्यात आलेला आहे.

सारडा सर्कल, वेद मंदिराकडे जाणारा रोड घनश्याम लाँड्रीजवळ, मायको सर्कल, गोल्फ क्लब मार्गाच्या बाजूने सेंट फ्रान्सेस हायस्कुल, जलतरण तलाव सिग्नल, मोडक सिग्नल, गडकरी सिग्नल, चांडक सिग्नल, जलतरण तरण सिग्नल, महापालिका आयुक्तांचा बंगला, ठक्कर बाजार मनसे पक्ष कार्यालय, आण्णा भाऊ साठे पुतळा, खडकाळी सिग्नल नाशिक शहरातल्या या 11 प्रमुख ठिकाणी बॅरिकेडिंग लावण्यात आली आहे. या परिसरामध्ये मोठ्या प्रमाणावर मुस्लीम बांधव नमाज अदा करण्यासाठी एकत्र येत असतात. त्यामुळे नाशिक शहरातल्या या भागांतील प्रमुख रस्त्यांवर वाहतूक कोंडी होऊ नये, यासाठी शहरामध्ये वाहतूक विभागाने पर्यायी मार्ग ठरवून दिलेले आहेत.

वाहतूक विभागाने मायको सर्कलकडून मोडक सिग्नलकडे येणारे वाहने मायको सर्कल, चांडक सर्कल आणि संदीप हॉटेलमार्गे पुढे मार्गस्थ होणार आहेत. पुढे मोडक सिग्नलकडून मायको सर्कलकडे जाणारी वाहने सीबीएस सर्कल आणि टिळकवाडी सिग्नलमार्गे पुढे मार्गस्थ होणार आहेत. गडकरी सिग्नलकडून चांडक सर्कलकडे जाणारी सर्व वाहने संदीप हॉटेलमार्गे पुढे मार्गस्थ होणार आहेत. त्यानंतर चांडक सर्कलकडून गडकरी सिग्नलकडे जाणारी वाहतूक संदीप हॉटेल आणि मुंबई नाका मार्गे पुढे मार्गस्थ होणार आहे..