Crime News : माणुसकी ओशाळली! 'मीठ आणा, पेट्रोल घ्या..' धाराशिवमध्ये तरुणाला मरेपर्यंत मारहाण, कारण आलं समोर

मोबाईल चोरीच्या संशयावरून चार ते पाच तरुणांनी अमर लोमटे या तरुणाला अमानुषपणे मारहाण केली. ही घटना जिल्ह्यातील ढोकी गावात घडली आहे. या मारहाणीत या तरुणाचा मृत्यू झाला असून या मृत्यू प्रकरणात चार आरोपी विरोधात ढोकी पोलिसात गुन्हा दाखल झाला आहे. याचा व्हिडिओ सोशल मीडियावर व्हायरल देखील झाला आहे. अगदी जनावरांना मारतात तसे या तरुणाला मारहाण केल्याचं व्हिडिओमध्ये दिसत आहे. अमर लोमटे याला उसाने, काठीने बेदम मारहाण करण्यात आली. अमरचे वडील राजेंद्र लोमटे यांच्या फिर्यादीवरून अक्षय इंगळे, संतोष वाघमारे, अकबर शेख, शंकर चौधरी या चार आरोपींविरोधात ढोकी पोलिसात गुन्हा दाखल केला आहे. ढोकी पोलिसांनी आरोपीला अटक केली आहे.

अमर लोमटे या तरुणाला ज्या प्रकारे मारहाण करण्यात आली आहे. ते पाहून कोणच्याही तळपायाची आग मस्तकात जाऊ शकते. व्हिडीओमध्ये अमरची पाठीवर काळेनिळे व्रण दिसत आहे. तो अर्धामेला झालेला असतानाही टोळक्याची मारहाण सुरुच होती. त्याला शिव्यांची लाखोली वाहिली जात होती. त्याच्या पाठिवर मीठ आणि पेट्रोल टाकण्याचं बोललं जात होतं. रात्रीच्या अंधारात बांधून अमरला मारहाण करण्यात आली. कपडे फाटेस्तोवर तरुणाला मारहाण केली. तो सोडण्याची विनवणी करतानाही, आरोपींच्या पाषणा हृदयाला पाझर फुटला नाही. कळस म्हणजे या सर्व घटनेचा मोबाईलमध्ये चित्रिकरण केलं जात होतं. सर्वजण विनोद करत होते. त्याला शिव्याशाप देत होते.