निधी अडवला जात असेल तर रेकॉर्डवर घ्या आणि अजित पवारांसमोर मांडा, पंकजा मुंडेंच्या सूचना

पंकजा मुंडे म्हणाल्या, कोणीही आमदार असो... मला विचारल्या शिवाय बिले काढायची नाहीत, मला विचारल्या शिवाय रोजगार हमीचे पैसे द्याचे नाहीत असे कोणी म्हणत असेल तर ते रेकॉर्डवर घ्या आणि अजित पवारांसमोर मांडा. कारण, आमची भूमिका आडवा-आडवीची नाही. आम्ही काही घडवण्याच्या भूमिकेत आहोत. काही कमी पडलं तर चार गोष्टी मदत करुन उभ्या करु. विहिरीचे पैसे सुद्धा कोणी देत नसेल.. अशा तक्रारी माझ्याकडे आल्या तर त्याची गंभीर दखल घेतली जाईल. असे कोणी अधिकारी किंवा इतर कोणी करत असेल तर ऑन रेकॉर्ड घ्या आणि ते पालकमंत्र्यांना दाखवा.

बीडच्या परळी येथे घरकुला संदर्भात आयोजित कार्यशाळेत राज्याच्या पर्यावरण व पशुसंवर्धन मंत्री पंकजा मुंडे बोलत होत्या.. यावेळी व्यासपीठावर आमदार धनंजय मुंडे, जिल्हाधिकारी विवेक जॉन्सन व मुख्य कार्यकारी अधिकारी आदित्य जीवने यांची उपस्थिती होती. आता अशा पद्धतीने कामे नेमकी कोणी अडवली आणि पंकजा मुंडे यांनी हा इशारा कोणाला दिला याची चर्चा होऊ लागली आहे.