आई-बाबा मला शोधू नका, मोबाईल बंद पण इन्टाग्रामने दिला पत्ता, छत्रपती संभाजीनगरच्या तरुणीचं धक्कादायक पाऊल

क्लासला जाऊन, मैत्रिणींसोबत हसून-खेळून तिने तो वेळ घालवला, कोणालाच संशय येऊ दिला नाही. त्यानंतर मैत्रिणींना तिने शेवटचं टाटा केलं आणि त्यानंतर 28 वर्षीय तरुणासोबत ती निघून गेली. तिने त्याच्यासोबत कोर्ट मॅरेज केलं आणि त्यानंतर नव्या प्रवासाची सुरुवात केली. पुंडलिकनगर पोलिस ठाण्यात 'मिसिंग'ची तक्रार दाखल झाली आणि पोलिसांनी तरुणीचा शोध सुरू केला. तिचा मोबाईल बंद होता, त्यामुळे तपास यंत्रणेसाठी हे मोठे आव्हान होतं.

मोबाईल बंद झाल्याने पोलिसांनी टेक्नोलॉजीची मदत घेतली. तांत्रिक तपासानंतर पोलिसांनी तरुणाच्या इन्स्टाग्राम आयडीचा शोध घेतला आणि त्यांच्या तपासाला दिशा मिळाली. पोलिसांनी थेट तरुणाशी इन्स्टाग्रामवरून संपर्क साधला. काही वेळातच तरुणाने पोलिसांच्या व्हॉट्सअॅपवर त्यांच्या लग्नाचे 'रजिस्टर्ड मॅरेज सर्टिफिकेट' पाठवले आणि आपण व्यवसाय करत असल्याची माहिती देखील दिली. यानंतर पोलिसांनी थेट तरुणीशी बोलायचं असल्याचं सांगितलं.

पोलिसांनी तरुणीशी संपर्क साधला आणि तिच्या आई वडिलांशी फोनवर बोलणं करुन दिलं. आई पूर्ण खचली होती, रडत होती, वडिलही खचले, पण तरुणीने धीरगंभीरपणे आणि संयम ठेवून शांतपणे आईशी बोलली. ती म्हणाली, "आई-बाबा, रागवू नका. मी योगेशसोबत लग्न केलंय. मी खूप सुखात आहे. मला परत यायची अजिबात इच्छा नाही. कृपया माझा शोध घेण्याचा प्रयत्न करू नका." एका सुशिक्षित, २२ वर्षांच्या मुलीने कायद्याच्या चौकटीत राहून, स्वतःच्या आयुष्याचा घेतलेला हा धाडसी निर्णय होता. आई वडिलांना तिने घेतलेल्या या निर्णयामुळे मोठा धक्का बसला होता.